Azərbaycan, Bakı, 27 oktyabr / Trend , müxbir R.Hafizoğlu/
Türkiyədəki hakim Ədalət və İnkişaf Partiyası (AKP) müxalifətin etiraz etməsinə baxmayaraq, ölkədə mövcüd olan kürd problemini həll etmək iqtidarındadır.
"Türkiyə hakimiyyəti kürd problemini həll etmək iqtidarındadır", - deyə çərşənbə axşamı türkiyəli ekspert İsmayıl Yaşa Ər- Riyaddan Trend - a telefonla bildirib.
Trend -un arayışı: Türkiyənin Baş naziri Rəcəb Tayyib Ərdoğan hakim Ədalət və İnkişaf Partiyasının keçirdiyi toplantıda Türkiyənin nə olursa olsun, ölkədə mövcud olan kürd problemini həll edəcəyini bildirib. Baş nazir bundan əvvəl bu problemin həlli üçün kürdyönlü Demokratik Toplum Partiyasının (DTP) lideri Əhməd Türk ilə görüşüb. Baş nazir bu görüşün müsbət keçdiyini və tez bir zamanda ölkədə mövcud olan kürd problemi həllinin tezləşəcəyini bildirib. DTP lideri Türk də bu görüşün ikitərəfli dialoqun yaranması üçün başlanğıc olduğunu bildirib. Türkiyənin əsas müxalifət partiyasının lideri Dəniz Baykal isə bu görüşü hakimiyyətin terroru dəstəkləyənlərlə görüşü kimi dəyərləndirib. Avqustun 13-də Türkiyənin daxili işlər naziri Bəşir Atalay da DTP lideri Türk ilə görüşüb.
Türkiyənin Milliyətçi Hərəkat Partiyasının (MHP) lideri Devlet Bahçeli partiyanın keçirdiyi mətbuat konfransında ölkədəki hakim AKP (Ədalət və İnkişaf Partiyası) ilə PKK terror teşkilatının eyni düşüncədə olduğunu bildirib.
Türkiyənin müxalif Cümhuriyyət Xalq Partiyasının (CHP) lideri Dəniz Baykal keçirdiyi mətbuat konfransında isə terrorla mübarizə aparmadan terrora qalib gəlməyin qeyri-mümkün olduğunu bildirib.
Türkiyəli ekspret hesab edir ki , hakimiyyətin kürd problemini həll etmək üçün atdığı addımlar problemin həlli istiqamətində çox önəmlidir.
"PKK-çılar İraqın şimalında qalıb silahlı mübarizəni davam etdirməkdənsə, təhlükəsizlik qüvvələrinə tabe olsalar daha yaxşıdır", - deyə Yaşa bildirib.
Yaşanın sözlərinə görə, PKK-çıların Türkiyə ərazisində necə qəbul edilmələri isə bir o qədərdə önəmli deyil.
PKK terror təşkilatının həbsdə olan lideri Abdulla Öcalanın müraciəti ilə oktyabrın 19-da İraqın şimalındakı Mahmur terror düşərgəsindən təslim olmaq üçün 26 nəfər yola çıxıb və elə həmin gün Türkiyə arazisinə çataraq təhlükəsizlik qüvvələrinə təslim olublar. Ölkənin daxili işlər naziri Bəşir Atalay təhlükəsizlik qüvvələrinin daha 150 terrorçunun təslim olacağını gözlədiyini bildirib. Təslim olan terrorçuların İraq-Türkiyə sərhədində PKK-nın bayrağı və xüsusi təmtəraqla qarşılanması ölkə müxalifətinin kəskin etirazına səbəb olub. Təslim olan terrorçuların hamısı azadlığa buraxılıb.
Yaşa hesab edir ki, müxalifət partiyalarının hakimiyyətin irəli sürdüyü demokratik açılıma (kürd probleminin həlli) qarşı etiraz etmələrinin heç bir əsası yoxdur.
"Müxalifət, hakim partiyanın kürd problemini həll edərək növbəti seçkilərdə daha çox səs toplamasından ehtiyat edir", - deyə Yaşa qeyd edib.
Türkiyədə növbəti parlament seçkilərinin 2011-ci ildə keçiriləcəyi gözlənilir.
Yaşa demokratik açılımın Türkiyədə dövlət çevrilişi ilə nəticələnəcəyinin mümkünsüzlüyünü qeyd edib.
Türkiyə Ordusunun Baş Qərargah rəisi İlker Başbuğ İraqın şimalındakı Mahmur düşərgədisindən təslim olmaq üçün Türkiyəyə gələn terrorçuların təntənə ilə qarşılanmasının yolverilməz olduğunu bildirərək , Türkiyənin müdafiəsiz olmadığını bildirib.
"Ölkədə hər hansı bir hərbi çevrilişdən söz ola bilməz. Çünki ölkədə hərbi çevriliş üçün zəmin yoxdur" - deyə Yaşa qeyd edib.