Azərbaycan, Bakı, 29 aprel /Trend, müxbir A.Hüseynbala/
Azərbaycanın müxalifət deputat qrupunun üzvü deyib ki, Parlamentin növbəti iclasında əfv sərəncamının verilməsi və Amnistiya Aktının qəbul olunması ilə bağlı məsələ qaldıracaqlar.
"Bu il Parlament seçkilərinin keçiriləcəyini və Parlamentin üçüncü çağırış tərkibinin fəaliyyətinin də başa çatdığını nəzərə alaraq, Müsavat deputat qrupu iki siyasi aktın qəbul olunmasını arzulayır", - cümə axşamı Trend-ə deputat qrupunun üzvü Pənah Hüseyn bildirib.
Hüseynin sözlərinə görə, təkliflərində iki əsas məsələ üzərində dayanıblar.
"Birincisi, istərdik ki, ömürlük həbs cəzası alan və öz cəzalarının böyük bir hissəsini çəkən şəxslər müəyyən cəzaçəkmə müddəti ilə əvəz edilsin. İkincisi, amnistiya tətbiq edilməsi müvafiq qanunla mümkün olmayan cinayət maddələri istisna olmaqla, qalan bütün kateqoriyalardan olan məhbusların hamısının cəza müddətindən bir il çıxılmasını təklif edirik", - o əlavə edib.
Millət vəkli deyib ki, veriləcək əfvin siyasi xarakterli olmasını təklif edirlər.
"Bu il seçkilər keçiriləcək və bir çox şəxslər üzərində məhkumluq olduğuna görə, onlar seçkilərdə iştirak imkanından məhrumdurlar. Həbsdə siyasi məhbus hesab olunan şəxslər də var. İstərdik ki, əfv, yaxud amnistiya bunlara da şamil edilsin. Fikrimcə, bununla bağlı hüquqşünasların rəy verməsi zəruridir", - Hüseyn vurğulayıb.
Müsavat deputat qrupunun üzvü qeyd edib ki, onların hazırladığı layihədə əvvəllər Azərbaycanda vəzifədə olub, barələrində cinayət işləri qaldırılan şəxslərin də adlarının əfv siyahısına salınması əksini tapir.
"Əlbəttə, biz konkret çərçivə müəyyən etmirik və düşünürük, bu qərarların verilməsi Prezidentdən, yaxud Parlamentdən asılıdır", - millət vəkili xatırladıb.
1994-cü ildən indiyədək imzalanmış 47 əfv fərmanı ilə 5029 şəxs cəzadan azad edilib. Fərmanların 15-i İlham Əliyev, 32-si isə mərhum Prezident Heydər Əliyev tərəfindən imzalanıb. İndiyədək imzalanan 8 Amnistiya Aktı 40 min məhkuma şamil olunub.
Sonuncu əfv fərmanı martın sonunda Novruz Bayramı münasibətilə imzalanıb.
Azərbaycan Parlamentində müxalifəti təmsil edən 12 deputat var. Parlament seçkilərindən sonra yeddi nəfərdən ibarət müxalifət deputat qrupu yaradılsa da, onun fəaliyyəti uğurlu olmayıb və qrup dağılıb. Hazırda Parlamentdə beş nəfərdən ibarət Müsavat deputat qrupu mövcuddur. Bu deputat qrupu 2005-ci ilin noyabr ayında keçirilən Parlament seçkisindən sonra yaradılıb. Qrupda müxalif Müsavat Partiyasının dörd üzvü - Nəsib Nəsibli, Arzu Səmədbəyli, İkram İsrafil, İltizam Əkbərli və Xalq Partiyasının sədri Pənah Hüseyn təmsil olunur.
Deputat qrupu indiyədək Parlamentə 10-dan çox müxtəlif qanun layihəsi təqdim edib.