Azərbaycan, Bakı, 4 may /Trend, muxbir M.Əliyev/
Rumıniya Azərbaycan - NATO dialoqunu dəstəkləyir və alyansın ölkəmizdəki koordinatoru kimi "Azərbaycanın Şimali Atlantika Alyansına yaxınlaşmasına töhfəsini verməyə çalışır, - Trend-in məlumatına görə, bunu çərşənbə axşamı Bakıda "NATO-nun Avropada və strateji məkanda stabilliyin və təhlükəsizliyin təmin olunmasında rolu" mövzusunda keçirilən konfransdakı çıxışında Rumıniyanın Azərbaycandakı səfiri Nikolaye Ureke bildirib.
"Azərbaycanın NATO-nun Əfqanıstandakı sülhməramlı missiyasında iştirakını dəstəkləyirik. Bu tip konfransların keçirilməsində əsas məqsəd NATO-nun rol və funksiyasını aydınlaşdırmaqdır. Biz alyansın oynadığı rolu Azərbaycan ictimaiyyətinə çatdırmağa can atırıq. Çünki bir qayda olaraq, postsovet ölkələri alyans barədə səthi təsəvvürlərə malikdir", - səfir əlavə edib.
Azərbaycan Təhlükəsizlik və Müdafiə İctimai Assosiasiyasının (ATMİA) və NATO ilə əlaqələndirici olan Rumıniyanın Azərbaycandakı Səfirliyinin təşkilatçılığı ilə Azərbaycan - NATO əməkdaşlığının 16 illiyinə və alyansın yaranmasının 61 illiyinə həsr olunan tədbir keçirilir..
Konfransın əsas məqsədi Azərbaycan - NATO əməkdaşlığının reallıqlarını və perspektivlərini müzakirə etməkdir.