Azərbaycan, Bakı, 10 iyun /Trend, müxbir T.Hacıyev/
Azərbaycanın Demokratiya Uğrunda İttifaqına (DUİ) daxil olan pariyalar diplomatik nümayəndəliklərə müraciət ünvanlamağa hazırlaşır. Bu barədə Trend-ə cümə axşamı DUİ-nin Seçki Qərargahının sədri Əhməd Oruc məlumat verib.
"Demokratiya Uğrunda İttifaqın seçki qərargahının çərşənbə günü keçirilən iclasında qərb ölkələrinin səfirlikləri ilə əlaqələr yaratmaq və seçki prosesində onlarla koordinasiya olunmuş şəkildə fəaliyyət göstərmək qərara alınıb. Bununla bağlı diplomatik nümayəndəliklərə müraciət hazırlanır", - Oruc deyib.
Azərbaycanda parlament seçkilərinin 2010-cu ilin payızında keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.
Orucun sözlərinə görə, seçkilərin rəsmi startı verilənə qədər seçki qərargahı tərəfindən görüləsi məsələlər ətrafında müzakirələr apardıq.
Dеmоkrаtiyа Uğrunda İttifаqı 2005-ci il parlamеnt seçkisindən sonra müxalifətçi Klassik Xalq Cəbhəsi, Azadlıq və Milli Demokrat partiyaları yаrаdıb. 2008-ci il sеntyаbrın əvvəllərində Böyük Azərbаycаn, nоyаbr аyındа isə Хаlq pаrtiyаlаrı DUİ-yə üzv qəbul оlunub. İttifаq bu pаrtiyaların məşvərət və əməkdaşlıq qurumudur. Oktyabr ayında Milli Demokrat Partiyası DUİ-dən çıxarılıb və Milli Qurtuluş Partiyasının quruma üzv qəbul olunması haqqında qərar verilib.
