Azərbaycan, Bakı, 20 avqust /Trend, müxbir M.Əliyev/
Oktyabrda Azərbaycana ölkədə keçiriləcək Parlament seçkilərini müşahidə etmək üçün Avropa Şurasının uzunmüddətli müşahidəçilərinin nümayəndə heyəti gələcək. Bu barədə cümə günü jurnalistlərə AŞPA-nın vitse-prezidenti, Azərbaycanın təşkilatdakı nümayəndə heyətinin rəhbəri Səməd Seyidov deyib.
Azərbaycanda Parlament seçkilərinin 2010-cu ilin noyabr ayının 7-də keçiriləcəyi gözlənilir. Bundanəvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində aparılır.
Onun sözlərinə görə, Avropa Şurası Azərbaycana seçkilərin gedişinə nəzarət etmək üçün iki - uzunmüddətli və qısamüddətli nümayəndə heyəti göndərəcək. "Qısamüddətli müşahidəçilər missiyası bilavasitə seçkilər zamanı həyata keçiriləcək və nümayəndə heyəti daha geniş tərkibdə - Avropa Şurası partiyalarının nümayəndələri və deputatları ilə təmsil olunacaq", - Seyidov qeyd edib.
"Hər iki missiya Azərbaycan üçün mühümdür və biz onların müşahidəçilik missiyalarını uğurla aparmaları üçün əlimizdən gələni edirik", - o əlavə edib.