Azərbaycan, Bakı, 1 sentyabr /Trend, müxbir T.Hacıyev/
Azərbaycanın Sosial Demokrat Partiyasının (ASDP) sədri hesab edir ki, Azərbaycan siyasi reallığında bloklaşmaq mümkün deyil.
"Azərbaycan siyasi reallığında bloklaşma, birləşmək mədəniyyəti yoxdur. Biz keçən seçkilərdən qərar vermişik ki, heç bir seçkilərə bloklar şəklində getməyəcəyik", - çərşənbə günü Trend-ə ASDP həmsədri Araz Əlizadə bildirib.
O, öz fikirlərini ötən seçkilərin təcrübəsində özünü göstərən amillərlə izah edib.
"Ötən dövrlər ərzində bir neçə dəfə blok yaratmaq cəhdi olub, lakin heç nə alınmayıb. Azərbaycan siyasətinin simaları dəyişməyib, ona görə də hələ ki bloklaşma məsələsinin xeyri olmayacaq. Bu gün Müsavat ilə Azərbaycan Xalq Cəbhəsi partiyaları seçkilərdə birgə iştirak etmək üçün blok yaratmağa çalışırlar, ancaq hələ də dairələrdə öz namizədlərini müəyyən edə bilməyiblər", - Əlizadə əlavə edib.
Azərbaycanda parlament seçkilərinin 2010-cu il noyabrın 7-də keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.
Əlizadə təmsil etdiyi partiyanın parlament seçkilərində iştirakı məsələsinə də toxunub.
"Builki parlament seçkilərində iki və ya üç namizədlə iştirak edəcəyik. Çünki bizim maddi imkanlarımız zəifdir. Parlamentdə təmsilçilik əldə etməsək, məyus olmayacağıq və mübarizəmizi davam etdirəcəyik", - partiya sədri vurğulayıb.
Azərbaycan Sosial Demokrat Partiyası 1989-cu ildə təsis edilib, 1990-cı ildə qeydiyyatdan keçib. ASDP-nin ideologiyasının əsasında sosial-demokratik dəyərlərin cəmiyyətdə bərpa olunması durur. Partiya siyasi sistemdə solçuluq mövqeyini müdafiə edir.