Azərbaycanda Parlament seçkiləri ilə bağlı 394 yerli müşahidəçi Mərkəzi Seçki Komissiyasında qeydiyyatdan keçib
Azərbaycan, Bakı, 24 sentyabr /Trend, müxbir T.Hacıyev/
Azərbaycanda seçkiləri müşahidə etmək üçün indiyə qədər 394 nəfər Mərkəzi Seçki Komissiyasında (MSK) qeydiyyatdan keçib. Bu barədə cümə günü Trend-ə MSK-nın mətbuat xidmətindən məlumat veriblər.
Məlumatda qeyd olunur ki, 394 nəfər müraciət edərək, bütün ölkə ərazisi üzrə müşahidə aparmaq arzusunda olduğunu bildirib. Bütün müraciətlərə müsbət cavab verilib.
MSK-da qeydə alınmış müşahidəçilərdən 27-si xüsusi icazə almış müşahidəçilərdir. Müşahidəçilərin 309-u öz təşəbbüsü, 35-i siyasi partiyalar, 3-ü isə QHT-lərin təşəbbüsü ilə müşahidəçilik muissiyasını həyata keçirəcəklər. Ombudsmandan isə 40 nəfərin müşahidəçiliyi qeydə alınıb.
Bütün ölkə ərazisi üzrə müşahidə aparılmasına dair ərizələrin qəbul olunması oktyabrın 28-dək davam edəcək.
Hər hansı bir seçki dairəsi ərazisində müşahidə aparmaq istəyən şəxslər isə səsvermə gününə 5 gün qalanadək, yəni noyabrın 2-dək müvafiq seçki dairəsinin dairə seçki komissiyasına müraciət edə bilərlər.
Azərbaycanda Parlament seçkiləri noyabr ayının 7-də keçiriləcək. Sentyabrın 3-də seçkilərə rəsmi start verilib. Bundanəvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində aparılır.
