Azərbaycan, Bakı, 13 oktyabr /Trend, müxbir Ü.Sadıqova/
Fələstinlə İsrail arasında sülh danışıqlarının qızğın vaxtında, İsrailin qeyri-yəhudi əhaliyə münasibətdə ayrı-seçkilik siyasəti yürüdən dövlət olduğu barədə fikir formalaşdıran vətəndaşlıq haqqında yeni qanunun qəbulu kimi mənfi siqnallardan qaçmaq lazımdır. İsrailin azlıqların işləri üzrə naziri Avişay Braverman (Avishay Braverman) belə hesab edir.
"İsrailin ərəb əhalisini küsdürən və İsraili beynəlxalq ictimaiyyətin gözündə pis qələmə verən vətəndaşlıq haqqında yeni qanun və ya qərarın [...] mahiyyəti problemlidir", - israilli nazir Trend-ə bildirib.
İsrail hökuməti bazar günü keçirilən iclasda İsrail vətəndaşlığına qəbul zamanı yəhudi dövlətinə sədaqət andı içməklə bağlı qanun layihəsini təsdiqləyib. Baş nazir Benyamin Netanyahunun təklif etdiyi yeni qanun yalnız ölkənin yəhudi olmayan, o cümlədən, İsrail əhalisinin 20 faizini təşkil edən ərəblərə şamil edilir.
Leyboristlərin "Avoda" Partiyasından nazir olan Braverman Nazirlər Kabinetində bu qanunun qəbul edilməsinin əleyhinə səs verib.
"İşçi partiyasının üzvü kimi, mən qanunun əleyhinə səs verdim və hiss edirəm ki, o, İsrail hökumətini ləkələyir", - Braverman bildirib.
İsrailin azlıqların işləri üzrə nazirinin fikrincə, əgər qanun diqqətlə nəzərdən keçirilərsə, onda İsrail hökumətinin "özünə oradan çıxmağın çətin olacağı quyu qazdığını" görmək mümkündür.
Formal olaraq israilli ərəblər ölkənin yəhudi əhalisi ilə ölkə Parlamentinə - yəni Knessetə seçki və iştirak da daxil olmaqla, eyni hüquqlara malikdirlər.
Vətəndaşlıq haqqında yeni qanunun qəbulu, başlanmasından bir ay sonra müvəqqəti dayandırılan Fələstin-İsrail sülh danışıqlarındakı böhranla eyni vaxta təsadüf edir. Danışıqların aparılmasına maneə İsrail hökumətinin İordan çayının qərb sahilində yəhudi yaşayış məskənlərinin tikintisinə moratoriumun müddətini uzatmaqdan imtina etməsidir.
Baş nazir Benyamin Netanyahu bazar ertəsi fələstinliləri, İsraili yəhudi dövləti kimi tanımağa çağırıb və bunun əvəzində moratoriumun müddətinin əlavə uzadılmasını vəd edib. Fələstin tərəfi bundan dərhal imtina edib.
Nazir Bravermanın fikrincə, bu qanunun qəbul edilməsinin zəruriliyində təəccüb və sual doğuran cəhət - sülh dialoqunun dirçəldilməsinin ən qızğın vaxtında, eləcə də onun başçılıq etdiyi "Yeni sövdələşmə" layihəsi hazırlandığı zaman, ərəb əhalisi üçün İsrailin qeyri-yəhudi əhalinin hüquqlarının tapdandığı dövlət olması barədə siqnallar göndərilməsidir.