Azərbaycan, Bakı, 3 dekabr /Trend, müxbir T.Hacıyev/
Azərbaycanın müxalif Müsavat Partiyasında hələ də birləşmə ilə bağlı qərar verilməməsi Xalq Cəbhəsi Partiyasında narahatlıq yaradır. Bu barədə cümə günü Trend-ə Xalq Cəbhəsi Partiyasının (AXCP) sədr müavini Fuad Qəhrəmanlı bildirib.
"Bizim gözləntimiz ondan ibarətdir ki, Müsavat birləşmə ilə bağlı müsbət qərar qəbul etsin, ancaq bu qərarın hələ də qəbul olunmamağı bizdə narahatlıq yaradır. Bizim istəyimiz ondan ibarətdir ki, bu proses sonda müsbət yekunlaşsın. Çünki birləşmə təkcə Xalq Cəbhəsinin istəyi deyil, Azərbaycan cəmiyyətinin Müsavat Partiyasından gözləntisidir", - Qəhrəmanlı əlavə edib.
İyulun 15-də AXCP-nin yaranmasının 21 illiyinə həsr olunmuş tədbirdə Müsavat başqanı İsa Qəmbər Rəsulzadə-Elçibəy yolunda olan siyasi partiyalarının birləşməsini təklif edib. Bu təklifə ilk reaksiya AXCP-dən gəlib. AXCP-nin sentyabrın 25-də keçirilən qurultayı zamanı Müsavat partiyasına birləşmək haqqında qərar qəbul olunub.
AXCP funksioneri Müsavat partiyasından istefa verən Sülhəddin Əkbərlə İbrahim İbrahimlinin verdiyi bəyanata da toxunub. "Bəyanatdakı fikirlər bizi də narahat etdi və xeyli dərəcədə təəccübləndirdi. Bizim də istəyimiz ondan ibarətdir ki, Sülhəddin bəylə İbrahim bəyin istefası Müsavat Partiyasının diqqətini bir daha birləşmə ilə bağlı müsbət qərar qəbul edilməsinə yönəltsin", - Qəhrəmanlı deyib.
Noyabrın 29-da Müsavat Partiyasının Məclis sədri Sülhəddin Əkbər tutduğu vəzifədən, Divan üzvü İbrahim İbrahimli isə partiya sıralarından istefa verib. Əkbər bu hərəkətini partiyanın strateji kursu ilə razılaşmamağı ilə əlaqələndirib. İbrahim İbrahimli isə partiya rəhbərliyinin ona etimad göstərmədiyini əsas gətirərək partiya sıralarını tərk edib.
Hər iki siyasətçinin noyabrın 30-da yaydığı birgə bəyanatda qeyd olunub ki, istefa vermələrinə səbəb Müsavatın daxilində bəzi qüvvələrin AXCP-Müsavat birliyinə mane olmasıdır.
