Azərbaycan, Bakı, 6 dekabr /Trend, müxbir T.Hacıyev/
Azərbaycan Xalq Cəbhəsi və Müsavat partiyalarının birləşməsinə maneə yaradan Müsavat başqanının növbəti dəfə başqanlığa namizədliyini verməyəcəyi ilə bağlı siyasi bəyanatıdır. Bu barədə bazar ertəsi Trend-ə Azərbaycan Xalq Partiyasının lideri Pənah Hüseyn bildirib.
"Əgər Müsavat başqanı İsa Qəmbər başqanlığa yenidən namizədliyini verərsə, bu problem aradan qalxa bilər" - Hüseyn deyib.
İyulun 15-də AXCP-nin yaranmasının 21 illiyinə həsr olunmuş tədbirdə Müsavat başqanı İsa Qəmbər Rəsulzadə-Elçibəy yolunda olan siyasi partiyaların birləşməsini təklif edib. Bu təklifə ilk reaksiya AXCP-dən gəlib. AXCP-nin sentyabrın 25-də keçirilən qurultayı zamanı Müsavat partiyasına birləşmək haqqında qərar qəbul olunub. Müsavatın məclis sədri Sülhəddin Əkbər və Divan üzvü İbrahim İbrahimli birləşmə prosesinin uzanmasına etiraz edərək partiyadan istefa veriblər.
"Müsavatın nizamnaməsinə yenidən baxıla bilər və nizamnamədə göstərilən başqanın iki dəfə seçilməsi məsələsi öz hüquqi qüvvəsini itirə bilər. Mənim ən optimal saydığım variant odur ki, ən azı keçid dövrü üçün birləşmiş partiyaya həmsədrlər seçilsin. Bu AXCP tərəfdən Əli Kərimli və Müsavat tərəfdən İsa Qəmbər ola bilər. O halda bütün problemlər aradan qalxar. Amma əlbəttə ki, bütün bu qərarları partiyaların qurultayları verə bilər", - Hüseyn əlavə edib.
Hüseynin sözlərinə görə, AXCP və Müsavat birləşərsə, bu, hüquqi cəhətdən 1911-ci ildə əsası qoyulmuş partiyanın davamı olacaq.
"Adı da Müsavat olacaq. Ancaq bu, həm də yeni bir təşkilat xarakteri alacaq", - o, qeyd edib.
AXP lideri bildirib ki, bu birləşmə baş tutacağı təqdirdə, lideri olduğu Azərbaycan Xalq Partiyasının da bu prosesə qoşulmasının tərəfdarıdır.
Azərbaycan Xalq Cəbhəsi Milli Azadlıq Hərəkatı zamanı gizli şəkildə 1989-cu ildə təsis olunub. Partiya kimi 1995-ci ildə qeydiyyatdan keçib. Partiya sədri Əbülfəz Elçibəyin vəfatından sonra ideoloji səbəblərdən partiya iki hissəyə - Azərbaycan Xalq Cəbhəsi Partiyası (AXCP) və Klassik Xalq Cəbhəsi Partiyası (KXCP) qollarına bölünüb.
Müsavat Partiyası 1911-ci ilin oktyabrında Bakıda yaradılıb. 1920-ci ilin aprelində Azərbaycan Sovet qoşunları tərəfindən işğal olunduqdan sonra Müsavat Partiyasının fəaliyyəti məhdudlaşıb və gizli fəaliyyət göstərməyə başlayıb.
1992-ci ilin noyabrında Müsavat Partiyasının III Bərpa Qurultayı keçirilib. Partiya ideologiyasının əsasında müsavatçılıq, türkçülük, müasirlik liberallıq ideyaları dayanır. Siyasi sistemdə mövqeyi sağ-mərkəzçidir.
