Azərbaycan, Bakı, 5 yanvar /Trend, müxbir T.Hacıyev/
Azərbaycanın müxalif Ədalət Partiyası rayon təşkilatlarının sayını artırmağı planlaşdırır. Bu barədə çərşənbə günü Trend-ə partiyanın sədr müavini Mütəllim Rəhimli 2011-ci il üçün partiyanın planları barədə danışarkən deyib.
"Bizim bir neçə rayonda təşkilatımız yoxdur. Şəkidə, Bərdədə və Siyəzəndə yeni təşkilatlar yaradacağıq", - o, əlavə edib.
Rəhimli onu da qeyd edib ki, 2011-ci ildə partiyanın qarşısında duran əsas məsələlərdən biri də seçki komissiyalarının formalaşdırılmasında iştirak etməkdir.
"Partiya olaraq Mərkəzi Seçki Komissiyasının, dairə və məntəqə seçki komissiyalarının formalaşmasında iştirak etmək nəzərdə tutulub", - o, deyib.
Ədalət Partiyası 1993-cü ildə yaradılıb, 1996-cı ildə Azərbaycan Demokrat Partiyasına (ADP) birləşib. 2000-ci ildə "Ədalət"çilər ADP-dən ayrılaraq partiyanın fəaliyyətini bərpa ediblər. 2001-ci ildən indiyədək Ədalət Partiyasına İlyas İsmayılov sədrlik edir.