Azərbaycan, Bakı, 13 yanvar /Trend, müxbir Y.Ostapenko/
Trend-in Latviya Prezidenti Valdis Zatlerslə müsahibəsi
- Cənab Prezident, yanvarda Azərbaycan Prezidenti İlham Əliyevin Latviyaya qarşıdakı səfərindən nə gözləyirsiniz? Səfər zamanı ikitərəfli əməkdaşlığı irəliyə aparacaq hansısa sənədlərin imzalanması planlaşdırılırmı?
- Bizim münasibətlərimiz stabillik, qarşılıqlı anlaşma və dərin hörmətə əsaslanır. Buna görə də mən Latviyada dostum İlham Əliyevi qəbul etməkdən şərəf duyuram. Bu səfər ölkələrimizin gələcək münasibətlərinin inkişafında müsbət impuls olacaq.
Ölkələrimiz arasında əməkdaşlığın hüquqi bazası artıq gözəl əməkdaşlıq və hökumətlərarası komissiyanın fəal işi sayəsində kifayət qədər işlənilib. Lakin bizim əməkdaşlığımızın gələcəkdə dərinləşməsi üçün prioritet kimi, daha dəqiq desək, fövqəladə hallar üzrə əməkdaşlıq və vergi informasiyasının mübadiləsi ilə bağlı müəyyən etdiyimiz sahələr var. Buna görə də səfər zamanı xəbərdarlıq və fövqəladə halların ləğvi sahəsində əməkdaşlığa dair saziş və qarşılıqlı inzibati yardım və vergi qanunvericiliyinə əməl olunması məsələlərinə dair saziş imzalanacaq.
- Avropa İttifqanın üzvü olan ölkə kimi, Latviya Azərbaycanın "Şərq tərəfdaşlığı" proqramı çərçivəsində həyata keçirdiyi Avropa inteqrasiyası prosesini necə qiymətləndirir? Bu təşəbbüsdən Sizin ümidləriniz özünü doğruldubmu?
- Latviya Aİ və Azərbaycan arasında münasibətlərin möhkəmlənməsinə tərəfdardır. Biz əlbəttə, Azərbaycanı Aİ üçün ən etibarlı tərəfdaşlardan biri hesab edirik. "Şərq tərəfdaşlığı" Aİ-nin şərq qonşuları ilə siyasi və praktiki əməkdaşlıq üçün yeni və misilsiz əsasdır. İslahatların dəstəklənməsi, ümumilikdə regionun sabitliyini təmin etmək üçün onun bizə vəsaitlər vermək potensialı var. Biz istərdik ki, Azərbaycanı bu alətlərdən islahatlar proqramını sadələşdirmək və Aİ ilə münasibətləri inkişaf etdirmək üçün istifadə etməyə çağıraq.
Avropa İttifaqı irəliləyişi qiymətləndirmək və gələcək əməkdaşlığın məqsədlərini müəyyənləşdirmək üçün mayda "Şərq tərəfdaşlığı"nın sammitini keçirməyi planlaşdırır. Biz "Şərq tərəfdaşlığı"nın imkanlarını hər bir tərəfdaşın fərdi tələbatlarına uyğunlaşdırmaq imkanından istifadə etməliyik. Mən əminəm ki, Azərbaycan ümumi gələcəyimiz üçün gündəliyin yaradılmasında fəal rol oynamaqda davam edəcək.
- Latviyanın Ermənistan-Azərbaycan, Dağlıq Qarabağ münaqişəsinin nizamlanması ilə bağlı mövqeyi necədir? Siz danışqılar prosesini necə görürsünüz?
- Dağlıq Qarabağ münaqişəsinə gəldikdə, Latviya münaqişənin tezliklə beynəlxalq hüquq və Birləşmiş Millətlər Təşkilatının ümumi qəbul edilən prinsiplərinə uyğun nizamlanmasını dəstəkləyir. Bu, Cənubi Qafqaz regionunda sülhün və sabitliyin təmini üçün həlledici əhəmiyyətə malikdir. Mən ümid edirəm ki, ATƏT-in Minsk qrupunun davam etməkdə olan səyləri Dağlıq Qarabağ münaqişəsinin nizamlanması prosesinə 2007-ci ilin noyabrında Madriddə təklif olunan prinsiplər əsasında impuls verəcək.
- Latviya və Azərbaycan arasında iqtisadi və ticari əməkdaşlığı necə qiymətləndirirsiniz? Fikrinizcə, hansı sahələr tərəfdaşlıq münasibətlərinin gələcək dərinləşməsi üçün daha prioritetlidir?
- Latviya və Azərbaycan arasında əlverişli siyasi mühit və hüquqi baza iqtisadi əməkdaşlığın genişlənməsi üçün geniş imkanlar açır. Son bir neçə ildə qarşılıqlı mal dövriyyəsində müsbət dinamika qeyd edilməkdədir.
Latviya sahibkarları Azərbaycanı böyük biznes imkanlarına malik ölkə hesab edirlər. Azərbaycana Latviya ixracının əsasını ərzaq malları, metal məmulatları və əczaçılıq preparatları təşkil edir. Latviya tərəfi İT sektorunda da əməkdaşlığın genişləndirilməsinə böyük maraq göstərir.
- Fikrinizcə, Avropanın enerji təhlükəsizliyinin təminində Azərbaycanın rolu hansıdır? Siz Avrasiya neft nəqli dəhlizi layihəsini necə qiymətləndirirsiniz?
- "Nabukko" layihəsi Avropa İttifaqı ölkələrinə qaz tədarükünün alternativ layihələrindən biridir. Ötən il iyulun 13-də Türkiyə, Rumıniya, Bolqarıstan, Macarıstan və Avstriya tərəfindən imzalanan "Nabukko" boru kəmərinin tikintisinə dair saziş Avropaya qaz tədarükünü diversifikasiya edəcək "Nabukko" layihəsinin müsbət inkişafından xəbər verir.
Avropa İttifaqının üzvü olan Latviya enerji marşrutu və mənbələrinin diversifikasiyasında maraqlıdır. Bunun nəticəsi olaraq, biz Azərbaycanı enerji resurslarının Xəzər regionundan Avropaya tədarükündə əsas oyunçulardan biri hesab edirik.
Latviya "Nabukko" layihəsində birbaşa iştirak etməsə də, biz onun uğur qazanmasında maraqlıyıq və ümid edirik ki, gələcəkdə Azərbaycan qazı bu qaz kəməri vasitəsilə Avropaya tədarük ediləcək.
