Azərbaycan, Bakı, 27 avqust /Trend, müxbir K.Zərbalıyeva/
Azərbaycan Fövqəladə Hallar Nazirliyinin nümayəndə heyəti Moldovada keçirilən "CODRII 2011" təlimində iştirak edir.
Trend-in nazirliyin rəsmi internet saytına istinadən verdiyi məlumata görə, avqustun 27-dən Moldovanın Kişinyov şəhəri yaxınlığında "Koşteşti" təlim bazasında NATO-nun Fəlakətlərə Cavabın Əlaqələndirilməsi üzrə Avro-Atlantik Mərkəzinin (EADRCC) və Moldova Daxili İşlər Nazirliyinin Mülki Müdafiə və Fövqəladə Xidmətinin 2011-ci il üzrə "CODRII 2011" adlı canlı təlimi keçirilir.
Sentyabrın 2-dək davam edəcək təlimin ssenarisi əsasən paytaxt Kişinyovdan 225 km uzaqda 7.5 bal gücündə baş vermiş zəlzələnin törətdiyi fəsadların aradan qaldırılmasından ibarətdir.
Təlimdə Fövqəladə Hallar Nazirliyinin 24 nəfərdən ibarət axtarış-xilasetmə, kimyəvi, bioloji, radioloji və nüvə komandaları iştirak edirlər.
Tədbirdə Azərbaycanla yanaşı, NATO-ya üzv və tərəfdaş dövlətlərin komandaları, həmçinin BMT, Avropa İttifaqı və digər beynəlxalq təşkilatların nümayəndələri iştirak edirlər.