Azərbaycan, Bakı, 26 sentyabr /Trend, müxbirlər D.Xatınoğlu, E.Tarıverdiyeva/
ABŞ hökuməti İran xalqına münasibətdə siyasətini bu ölkənin hökumətinə qarşı siyasətindən ayırır. Bu barədə çərşənbə günü Trend-ə ABŞ Dövlət Departamentinin İran üzrə rəsmi nümayəndəsi Alan Eyr bildirib.
"ABŞ dəfələrlə bəyan edib ki, problemlər İran xalqı ilə deyil, bu ölkənin hökuməti ilə mövcuddur", - Eyr qeyd edib.
O vurğulayıb ki, ABŞ İran vətəndaşları üçün artıq virtual səfirlik açıb və İran xalqı ilə münasibətləri genişləndirmək, habelə Birləşmiş Ştatların mövqeyini bu xalqa çatdırmaq üçün digər variantlardan istifadə edir.
"Biz hesab edirik ki, hakimiyyətin legitimliyi vətəndaşlardan asılıdır, çünki əks təqdirdə istənilən hökumət diktatura siyasətinin fəsadları ilə üzləşəcək", - Eyr deyib.
Eyrin sözlərinə görə, ABŞ hesab edir ki, İran xalqının azad söz, azad KİV, azad seçkilər və gender bərabərliyinə sahib ola biləcəyi demokratik dövlətdə yaşamaq hüququ var.
Dövlət Departamentinin rəsmisi bəyan edib ki, İslam Respublikası ölkədə insan hüquqları ilə bağlı sabit vəziyyətin yaradılması işində beynəlxalq məsuliyyət daşıyır.
Nüvə proqramı
İranın nüvə proqramından danışan Eyr qeyd edib ki, bu məsələ Birləşmiş Ştatlar üçün əsas problem olaraq qalır.
"Barak Obama Vaşinqtonun İrana nüvə silahı yaratmağa imkan verməyəcəyi barədə bu ölkə hökumətinə aydın ismarış göndərib", - o deyib və əlavə edib ki, beynəlxalq ictimaiyyət də İranın nüvə silahı yaratmasına mane olmaqda tam qətiyyətlidir.
Eyr vurğulayıb ki, İranın nüvə iddialarına dair məsələnin diplomatik həlli üçün hələ vaxt var, lakin bu vaxt sonsuz deyil.
Onun sözlərinə görə, avqustun sonunda Tehranda keçirilmiş Qoşulamama Hərəkatının 16-cı sammiti zamanı bir çox üzv ölkələr İranı xüsusilə Suriya məsələsi daxil olmaqla xarici siyasətini dəyişdirməyə, həmçinin öz nüvə proqramına yenidən baxmağa çağırıblar.
"Bununla da İran iddia edə bilməz ki, Qoşulmama Hərəkatının üzvləri onun nüvə proqramını dəstəkləyiblər, çünki iştirakçı ölkələrin vahid mövqeyi yoxdur", - Eyr bildirib.
İran üzrə rəsmi nümayəndənin sözlərinə görə, ABŞ, İsrail və beynəlxalq ictimaiyyətin məqsədi İranın nüvə silahı yaratmasının qarşısını almaqdır.
"BMT Təhlükəsizlik Şurası İranın nüvə proqramının inkişafına mane olmaq məqsədilə rəsmi Tehrana qarşı dörd sanksiya qəbul edib və nəhayət Beynəlxalq Atom Enerjisi Agentliyi İranın nüvə proqramının mümkün hərbi aspektləri məsələsinə dair narahatlığını bildirib. Bu, təkcə ABŞ-ın deyil, dünya ictimaiyyətinin narahatlığıdır", - Eyr deyib.
Onun sözlərinə görə, İran qoşulmama haqqında müqavilə çərçivəsində bütün öhdəliklərini yerinə yetirməlidir.
Eyr vurğulayıb ki, əsas problem İran-ABŞ münasibətlərində deyil, İranın nüvə proqramında, insan haqlarının pozulmasında və Tehranın terrorizmi dəstəkləməsindədir.
"Müsəlmanların məsumiyyəti"
Eyrin sözlərinə görə, İslam ölkələrində iğtişaşlar və qətllərə səbəb olan antiislam film təkcə amerikalılar deyil, həmçinin BMT-nin əsaslandığı bütün ideallara qarşı zərbədir.
O əlavə edib ki, ABŞ Prezidenti Birləşmiş Ştatların diplomatlarına hücumların yolverilməz olduğunu aydın şəkildə başa salıb.
"Bizim iki variantımız var: terrorizmlə mübarizədə beynəlxalq ictimaiyyətlə eyni cəbhədə dayanmaq və ya kollapsa imkan vermək", - Eyr bildirib.