...

Strasburqda 28 May - Respublika Gününə həsr olunmuş tədbir keçirilib (FOTO)

Siyasət Materials 29 May 2013 03:02 (UTC +04:00)
28 May - Respublika Günü münasibətilə Azərbaycanın Avropa Şurası (AŞ) yanında Daimi nümayəndəliyi tərəfindən Strasburqda rəsmi ziyafət təşkil edilib.
Strasburqda 28 May - Respublika Gününə həsr olunmuş tədbir keçirilib (FOTO)

Azərbaycan, Bakı, 29 may /Trend/

28 May - Respublika Günü münasibətilə Azərbaycanın Avropa Şurası (AŞ) yanında Daimi nümayəndəliyi tərəfindən Strasburqda rəsmi ziyafət təşkil edilib.

Daimi nümayəndəlikdən Trend-ə verilən məlumata görə, ziyafətdə Avropa Şurasının baş katibi Torbyorn Yaqland, baş katibin müavini Qabriella Battaini-Draqoni, təşkilatın yüksək rütbəli şəxsləri, İnsan Hüquqları üzrə Avropa Məhkəməsinin üzvləri və numayəndələri, AŞ yanında və Strasburqda akkreditə olunmuş diplomatik korpusun rəhbərləri və əməkdaşları, Fransa parlamentinin üzvləri, dövlət və yerli qurumların təmsilçiləri, Strasburqdakı akademik dairələrin, eləcə də Azərbaycan və türk diasporunun təmsilçiləri iştirak ediblər.

Tədbiri giriş sözü ilə açan Azərbaycanın Avropa Şurası yanında daimi nümayəndəsi, səfir E.Eyyubov 28 May - Respublika Gününün yaranması tarixi və əhəmiyyəti barədə tədbir iştirakçılarına məlumat verərək, 95 illiyi qeyd edilən Azərbaycan Xalq Cümhuriyyətinin müsəlman Şərqində ilk dünyəvi demokratik parlament respublikası olduğunu qeyd edib. O, mürəkkəb siyasi vəziyyətə və qısa zaman ərzində mövcudluğuna baxmayaraq, Azərbaycan Xalq Cümhuriyyətinin bərabərliyə, hüququn aliliyi, insan haqlarının qorunması və təşviqinə əsaslanan demokratik, müasir və dünyəvi dövlət sisteminin formalaşdırılması sahəsində mühüm addımlar atdığını, mütərəqqi islahatlar həyata keçirdiyini, eləcə də qadınlara ilk dəfə seçki hüquqi verdiyini xüsusi vurğulayıb.

Sonra səfir Azərbaycanda sovet hakimiyyətinin qurulmasından və 1991-ci il oktyabrın 18-də Azərbaycanın müstəqilliyinin bərpasından söhbət açıb, xalqımızın tarix boyu öz müstəqilliyi üçün böyük qurbanlar verdiyini vurğulayıb.

E.Eyyubov müstəqilliyini bərpa etdikdən sonra Azərbaycanın ağır sınaqlardan keçməsinə baxmayaraq, siyasi, iqtisadi, hüquqi və sosial sahələrdə böyük islahatların həyata keçirildiyini diqqətə çatdırıb. O, demokratiya ənənələrinə sadiq olan Azərbaycanın 25 yanvar 2001-ci ildə Avropa Şurasına üzv olduğunu və bunun cəmiyyətin demokratikləşməsi və hüquqi dövlətin formalaşması istiqamətində əhəmiyyətini qeyd edib. Bu məqsədlərin həyata keçirilməsində ölkəmizin böyük yol qət etdiyini bildirən səfir Azərbaycanın Avropa Şurası ilə dialoq və əməkdaşlığa həmişə hazır olduğunu tədbir iştirakçılarının diqqətinə çatdırıb.

Ümummilli lider Heydər Əliyevin Azərbaycanın müstəqilliyinin bərpa olunub qorunmasında və beynəlxalq arenada mövqeyinin möhkəmləndirilməsində son dərəcə mühüm rolu olduğunu bildirən səfir Azərbaycan Respublikasının Prezidenti İlham Əliyev tərəfindən bütün sahələrdə müvəffəqiyyətlə həyata keçirilən islahatlar nəticəsində bu gün öz vətəndaşlarına xidmət edən iqtisadi cəhətdən güclü, demokratik baxımdan inkişaf etmiş, sosial sahədə rifahın formalaşdığı güclü Azərbaycan dövlətinin mövcud olduğunu vurğulayıb.

Bununla yanaşı, tədbirdə Əlimərdan bəy Topçubaşovun 150 illik yubileyinin keçirilməsi haqqında Azərbaycan Prezidentinin sərəncamına uyğun olaraq, Azərbaycan Xalq Cümhuriyyətinin yaradıcılarından biri olan Ə.Topçubaşovun həyat və fəaliyyəti haqqında mərasim iştirakçılarına məlumat verilib və slaydlar nümayiş etdirilib.

Səfir Ə.Topçubaşovun Sankt-Peterqburqda hüquq təhsili aldığını və 1897-ci ildə Hacı Zeynalabdin Tağıyevə məxsus olan "Kaspi" qəzetinin baş redaktoru olduğunu diqqətə çatdırıb. O, qeyd edib ki, Ə.Topçubaşov Rusiyada ilk müsəlman "İttifaq əl-Müslimin" siyasi partiyasının təsisçisi, Rusiya Dumasında Müsəlman fraksiyasının rəhbəri olub.

Diplomat habelə çıxışında yeni yaranmış Azərbaycan Xalq Cümhuriyyətinin tanınması məqsədilə Ə.Topçubaşovun rəhbərlik etdiyi Azərbaycan nümayəndə heyətinin 1918-ci ildən Paris sülh konfransında iştirakından və onun ABŞ Prezidenti V.Vilsonla keçirdiyi görüşdən bəhs edib. O qeyd edib ki, Azərbaycan diplomatik missiyasının göstərdiyi səylər nəticəsində Azərbaycan Xalq Cümhuriyyəti 11 yanvar 1920-ci ildə tanınır.

Bundan əlavə, çıxışda Ə.Topçubaşovun Azərbaycan Xalq Cümhuriyyətinin süqutundan sonra Parisdə yaşadığı, bütün həyatını doğma Vətəninin dövlət müstəqilliyinin bərpasına həsr etdiyi diqqətə çatdırılıb. Qeyd edilib ki, 8 noyabr 1934-cü ildə dünyasını dəyişmiş Ə.Topçubaşov Parisin Sent-Klu (Saint-Cloud) qəbiristanlığında dəfn olunub.

Xəbər lenti

Xəbər lenti