Azərbaycan, Bakı, 28 oktyabr /Trend, müxbir T.Cəfərov/
Ermənistan Parlamentinin nümayəndələri şənbə günü İrana səfər edəcəklər. Bunu İran Parlamentinin spikerinin beynəlxalq məsələlər üzrə müşaviri Hüseyn Şeyxul-islam deyib. Trend-in məlumatına görə, bu barədə FARS agentliyi məlumat verir.
Onun sözlərinə görə, üçgünlük səfər zamanı ermənistanlı parlamentarilər İran Parlamentinin spikeri Əli Laricani, İran parlamentinin Milli təhlükəsizlik və xarici siyasət komissiyasının sədri Əlaiddin Bürucerdi və İran-Ermənistan parlamentlərarası dostluq qrupunun sədri Əli Kaidi ilə görüşlər keçirəcəklər. Görüşlərdə ikitərəfli əlaqələrin inkişaf etdirilməsi və parlamentlərarası münasibətlərin artırılması kimi məsələlər müzakirə olunacaq.