...

Azərbaycanda məhkəmə hakimləri ilə bağlı qanunvericiliyə bir sıra yeniliklər edildi

Siyasət Materials 20 İyun 2014 14:47 (UTC +04:00)
Azərbaycanda məhkəmə hakimləri ilə bağlı qanunvericiliyə bir sıra yeniliklər edilib.
Azərbaycanda məhkəmə hakimləri ilə bağlı qanunvericiliyə bir sıra yeniliklər edildi

Azərbaycan, Bakı, 20 iyun /Trend, müxbir Elçin Mehdiyev/

Azərbaycanda məhkəmə hakimləri ilə bağlı qanunvericiliyə bir sıra yeniliklər edilib.

Trend-in məlumatına görə, Milli Məclisin bu gün keçirilən növbədənkənar plenar iclasında "Məhkəmələr və hakimlər haqqında" Azərbaycan Respublikası Qanununda dəyişikliklər edilib.

Ali Məhkəmənin qanunvericilik təşəbbüsü ilə parlamentə daxil olmuş qanun layihəsinə əsasən, mövcud qanunun 93-4-cü (Hakim vəzifəsinə təyin edilmənin xüsusi qaydası) maddəsinə daha bir hissə əlavə ediləcək. Əlavədə göstərilir ki, hakim vəzifəsindən öz arzusu ilə azad olunan şəxs bu qanunun 93-3-cü maddəsinin yeddinci hissəsində nəzərdə tutulmuş prosedurlardan kənar, Məhkəmə-Hüquq Şurasında müsahibədən keçməklə, qanunvericiliklə müəyyən edilmiş qaydada yenidən hakim təyin edilə bilər.

Bundan əlavə, qanun layihəsinə əsasən, mövcud qanunun 100-cü (Hakimləyin müstəqilliyi) maddəsinin də sonuna əlavə ediləcək. Təklif olunan variantda qeyd edilir ki, hakimin fəaliyyətinə kənar müdaxilə olduqda, o bu barədə Məhkəmə-Hüquq Şurasına müraciət etməlidir.

Qanunun 106-cı (Hakimlərin maddi təminatı) maddəsinə edilməsi gözlənilən əlavəyə görə isə hakimin fəaliyyəti dövründə onun əməkhaqqının məbləği aşağı salına bilməz.

"Məhkəmələr və hakimlər haqqında" Azərbaycan Respublikası Qanununun 113-cü (Hakimlərin səlahiyyətlərinə xitam verilməsinin əsasları) maddəsinə də əlavə və dəyişikliklər edilməsi nəzərdə tutulur. Belə ki, bu maddənin 9-cu bəndinə ediləcək dəyişikliyə görə, əmək qabiliyyətinin fasiləsiz olaraq altı aydan çox müddətə tam itirilməsi ilə əlaqədar vəzifəsini yerinə yetirə bilmədikdə də hakimlərin səaliyyətlərinə vaxtından əvvəl xitam verilə bilər.

Mövcud varianta görə isə altı aydan artıq müddətdə xəstəliyi ilə əlaqədar vəzifəsinin yerinə yetirməsinin qeyri-mümkünlüyü barədə Məhkəmə-Hüquq Şurası tərəfindən təşkil edilmiş xüsusi hakim komissiyasının müvafiq rəyi olduqda hakimlərin səaliyyətlərinə vaxtından əvvəl xitam verilə bilər.

Həmin maddənin 11-ci bəndinə isə aşağıdakı mətndə hissə əlavə ediləcək: "Əmək qabiliyyətinin tam itirilməsi müvafiq icra hakimiyyəti orqanının rəyi ilə müəyyən edilir. Əmək qabiliyyətinin tam itirilməsi dedikdə, müvafiq icra hakimiyyəti orqanının qərarı ilə hakimə müvafiq dərəcədən əlillik qrupu müəyyən edilməklə ən azı bir il müddətinə əmək qabiliyyətsiz hesab edilməsi başa düşülür".

Qanuna ediləcək dəyişiklərdən digərinə görə, XXI fəsil (Andlı iclasçılar) və Keçid müddəalarının 6-cı hissəsi (Qanunun andlı iclasçılara dair müddəaları məhkəmə-hüquq islahatları başa çatdıqdan və müvafiq qanun qəbul edildikdən sonra qüvvəyə minir) ləğv edilir.

Məqalədə:
Xəbər lenti

Xəbər lenti