Bakı. Trend:
Yeni Azərbaycan Partiyasının 41 saylı Sumqayıt birinci seçki dairəsindən deputatlığa namizədi Hicran Hüseynovanın seçicilərlə növbəti görüşü keçirilib.
Trend-in məlumatına görə, görüşdə çıxış edən deputatlığa namizəd Hicran Hüseynovanın vəkilləri fevralın 9-da keçiriləcək parlament seçkiləri haqqında geniş məlumat veriblər və bu seçkilərdə 41 saylı Sumqayıt birincki seçki dairəsindən YAP-ın namizədi olan Hicran Hüseynovanın seçki platforması haqqında danışıblar.
Çıxış edən natiqlər Hicran Hüseynovanın ailə, qadın və uşaq məsələləri sahəsindəki fəaliyyəti haqqında bəhs açıblar, bu sahədə gördüyü genişmiqyaslı işlərdən danışıblar. Namizədin vəkilləri seçiciləri layiqli namizədə- Hicran Hüseynovaya səs verməyə çağırıblar.
Çıxış edən Hicran Hüseynova seçiciləri salamlayıb və onunla görüşə gəldikləri üçün öz minnətdarlığını bildirib. Hicran Hüseynova gənclərlə bağlı danışaraq qeyd edib ki, gənclər ölkəmizin, eləcə də Sumqayıt şəhərinin inkişafında yaxından iştirak etməli, o cümlədən ölkə həqiqətlərinin beynəlxalq aləmə çatdırılmasında fəal olmalı, vətəndaşlıq borcunu layiqincə yerinə yetirməlidirlər. Hicran Hüseynova seçiciləri əmin etdi ki, Milli Məclisə seçiləcəyi təqdirdə öz seçiciləri ilə mütəmadi görüşlər keçirəcək, onları narahat edən məsələlərlə bağlı birgə fəaliyyət göstərəcək.
Çıxış edən seçicilər daha güclü Azərbaycan naminə YAP-ın namizədinə səs verəcəklərini bildiriblər.
