Bakı. Trend:
İranın Azərbaycandakı səfiri Seyid Abbas Musəvinin tvitter üzərindən açıqlaması Azərbaycanı diplomatik yolla təhdid etməkdir.
Trend-in məlumatına görə, bunu Trend BİA-nın direktor müavini, siyasi ekspert Rufiz Hafizoğlu səfirin "İranın maraqları və regionda milli təhlükəsizliyinin qırmızı xətləri" ilə bağlı tvitterdəki açıqlaması barədə "ARB24" telekanalında çıxışı zamanı deyib.
Onun sözlərinə görə, İranın Azərbaycana qarşı siyasəti getdikcə daha da radikallaşır və terror ixrac etmə yönündə inkişaf edir:
"İran dövlətinin maraqları aydındır ki, heç bir halda xalqımızın nə bugününə, nə də gələcəyinə xidmət edən amillərdir. Bu baxımdan hesab edirəm ki, səfirin tvitterdəki bu cür açıqlaması Azərbaycanı diplomatik yolla təhdid etməkdir. Baxmayaraq ki, Azərbaycan və İran arasında münasibətlər uzun müddətdir gərgindir, lakin Azərbaycan İranla diplomatik münasibətlərin normallaşması isitqamətində müəyyən addımlar atıb. Ancaq təəssüflər olsun ki, İranın siyasətində Azərbaycana qarşı müsbət dəyişikliklər müşahidə edilmir. Getdikcə bu siyasət daha da radikallaşır və terror ixrac etmə yönündə inkişaf edir. Hədəf Azərbaycanda daxili stabilliyi pozmaqdır", - deyə R.Hafizoğlu bildirib.