Bakı. Trend:
İnsanların sentyabrın 1-də növbədənkənar parlament seçki prosesində iştirakı üçün lazımi şərait yaradıldı, tədbirlər görüldü. Bu isə seçkilərin legitimliyini və şəffaflığını bir daha sübut edir.
Trend xəbər verir ki, bu barədə Türk Dövlətləri Təşkilatı Baş katibinin müavini Ömər Kocaman növbədənkənar parlament seçkilərinin yekunları ilə bağlı sentyabrın 2-də keçirilən mətbuat konfransında deyib.
O qeyd edib ki, Türk Dövlətləri Təşkilatı Seçki Kommisiyası missiyasına üzv dövlətlərin Mərkəzi Seçki Kommisiyasının nümayəndələri daxildir.
“Missiya öz fəaliyyətini seçkilərin keçirilməsinə dair beynəlxalq standarlara uyğun həyata keçirib. Seçki günündə TDT nümayəndə heyəti Bakı şəhəri Xətai rayonunda seçki məntəqəsinin açılışında iştirak etdi. Missiya ümumilikdə 36 seçki məntəqəsini ziyarət edib.
Müşahidəmiz zamanı seçki prosesində hər hansı neqativ hal qeydə alınmadı. İnsanların seçki prosesində iştirakı üçün lazımi şərait yaradılıb, tədbirlər görülüb. Bu isə seçkilərin legitimliyini və şəffaflığını bir daha sübut edir. Səslərin sayılması və elan olunması vaxtında həyata keçirildi.
Missiya seçkilərin nəticələrinə təsir edəcək neqativ halla rastlaşmayıb. Seçki məntəqələri yaxınlığında hər hansı kampaniya aparılması müşahidə edilmədi. Seçki bülletenləri qanunlara uyğun şəkildə hazırlanıb. Seçkilərin mediada işıqlandırılması onun şəffaflığına töhfə verən amildir.
TDT seçki müşahidə missiyası seçkilərin açıq və şəffaf, beynəlxalq seçki standarlarına uyğun həyata keçirildiyini təsdiq edir”, - deyə o bildirib.
Qeyd edək ki, sentyabrın 1-də Azərbaycanda növbədənkənar parlament seçkiləri keçirilib. İlkin nəticələrə görə, seçkilərdə seçici fəallığı 37,27 faiz təşkil edib. Seçkilərdə səs verən seçicilərin sayı 2 196 771 nəfər olub. 5895 seçki məntəqəsi protokollarını MSK-ya təqdim edib.
Seçkiləri müşahidə etmək üçün 112 min 749 yerli müşahidəçi qeydə alınıb. Onlardan 65 mindən çoxu siyasi partiyaların nümayəndələridir. Qeydə alınmış beynəlxalq müşahidəçilərin sayı 598 nəfər olub ki, onlar 51 Təşkilatı, 69 ölkəni təmsil edib. Parlament seçkilərində qeydə alınan 990 namizəddən 305-i 25 siyasi partiyanın nümayəndəsidir. 371 nəfər siyasi partiyaların üzvü olmasına baxmayaraq, partiyalar tərəfindən namizəd olaraq irəli sürülməyiblər. Ümumilikdə 676 namizədin siyasi partiya mənsubiyyəti var.