Bakı. Trend:
Dekabrın 12-si Azərbaycanın Ümummilli Lideri Heydər Əliyevin anım günüdür.
Trend xəbər verir ki, dekabrın 12-də Azərbaycanın müstəqilliyinin möhkəmlənməsi və inkişafında əvəzsiz xidmətləri olan görkəmli dövlət xadimi, xalqımızın ümummilli lideri Heydər Əliyevin əziz xatirəsi anılıb. Bu münasibətlə Xarici İşlər Nazirliyinin rəhbər şəxsləri Fəxri xiyabanda Heydər Əliyevin məzarını ziyarət edərək, önünə gül dəstələri qoyublar.
Eyni zamanda, görkəmli oftalmoloq alim, akademik Zərifə xanım Əliyevanın da xatirəsi yad edilərək məzarı önünə tər çiçəklər düzülüb.
Ziyarət zamanı Ümummilli Liderin Azərbaycanın dövlətçilik tarixində oynadığı mühüm rol, müstəqilliyimizin möhkəmləndirilməsi, xalqımızın rifahının və inkişafının təmin edilməsi istiqamətindəki misilsiz xidmətləri xatırlanıb. Heydər Əliyevin əbədiyaşar xatirəsi dərin hörmət və ehtiramla yad edilib.
