Bakı. Trend:
Fevralın 19-da Milli Məclisin inzibati binasında Asiya Parlament Assambleyasının (APA) “Asiyada çoxtərəfli əməkdaşlığın gücləndirilməsində parlament diplomatiyasının rolu” mövzusuna həsr edilmiş 15-ci plenar sessiyasının açılış mərasimi keçirilib.
Trend xəbər verir ki, tədbirdə 35 nümayəndə heyəti, o cümlədən, ümumilikdə 280 nəfərə yaxın nümayəndə iştirak edib.
15-ci Plenar sessiyanın açılışında Azərbaycan Respublikasının Dövlət himni səsləndirilib.
Açılış mərasimində çıxış edən Milli Məclisin sədri Sahibə Qafarova sessiya iştirakçılarını salamlayaraq, bu plenar sessiyada iştirak etdikləri üçün bütün parlamentlərin və beynəlxalq təşkilatların nümayəndələrinə minnətdarlığını bildirib. O, qeyd edib ki, bu, əməkdaşlığımızı daha da inkişaf etdirmək və bu platformanı möhkəmləndirmək istiqamətində qətiyyətli niyyətimizin və sadiqliyimizin göstəricisidir.
Milli Məclisin sədri çıxışının sonunda birgə səylərlə Asiya Parlament Assambleyasının potensialının tam şəkildə açılacağına, onun effektivliyinin maksimum dərəcədə artacağına inamını ifadə edib. Azərbaycan parlamentinin spikeri bugünkü plenar iclasın bizim ümumi öhdəliyimizin aydın sübutu olduğunu diqqətə çatdırıb və sessiyanın işinə uğurlar arzulayıb.
Sonra Asiya Parlament Assambleyasının Baş katibi Mohammad Reza
Majidi çıxış edib.
Baş katib sessiyanın yüksək səviyyədə təşkilinə və qonaqpərvərliyə
görə Azərbaycan Milli Məclisinə və parlamentin sədri Sahibə
Qafarovaya təşəkkürünü ifadə edib. O, ölkəmizin Asiya Parlament
Assambleyasına sədrliyinin uğurla davam etdirildiyini bildirib.
Qeyd edib ki, Azərbaycan tərəfinin bu təşkilata sədrliyə ilə
qarşıda duran məqsədlərə birgə səmərəli əməkdaşlıq nəticəsində nail
ola biləcəyik.
Sonra sessiyada Asiya Parlament Assambleyasına üzv ölkələrin parlament sədrləri, sədr müavinləri və üzvləri, o cümlədən Bəhreyn Şura Məclisinin sədri Əli Saleh Abdulla Əlsaleh, Butan Milli Assambleyasının sədri Lungten Dorci, İndoneziya Nümayəndələr Palatasının sədri Puan Maharani, İran İslam Şurası Məclisinin sədri Məhəmməd Baqir Qalibaf, Pakistan Senatının sədri Syed Yusuf Raza Gilani, Tacikistan Ali Məclisinin Nümayəndələr Palatasının sədri Mahmadtoir Zokirzoda, Özbəkistan Ali Məclisi Senatının sədri Tənzilə Narbayeva, Oman Şura Məclisinin sədri Xalid Hilal Nasir Al Maavali, Belarus Milli Assambleyası Respublika Şurasının sədri Natalya Koçanova, Birləşmiş Ərəb Əmirlikləri Federal Milli Şurası sədrinin birinci müavini Tariq Humaid Mohd Altayer, Fələstin Milli Şurasının sədr müavini Ali Faysal, İordaniya Milli Assambleyasının Nümayəndələr Palatası sədrinin müavini Əhməd Hamisat, Tailand Nümayəndələr Palatası sədrinin müavini Paradorn Prissananantakul, Türkiyə Böyük Millət Məclisinin üzvü Abdulkadir Emin Önen çıxış ediblər, mövzu ilə bağlı fikirlərini bölüşüblər.
Çıxışlarda tədbirin yüksək səviyyədə təşkil olunduğu qeyd edilib, Asiya Parlament Assambleyasının Azərbaycanın sədrliyi dövründə böyük uğurlar qazanacağına inam ifadə olunub. İştirakçılar bu gün APA-nın regional problemlərin həllində və regional inteqrasiyanın sürətlənməsində mühüm rolundan söhbət açıblar. Qurumun regionda davamlı inkişafın, insan hüquqlarının, sülh və sabitliyin təşviqi, çoxtərəfli əməkdaşlığın gücləndirilməsi kimi məsələlərə önəm verdiyi bildirilib, bununla bağlı ümumi məqsədlərə çatmaq üçün həyata keçirilən tərəfdaşlığın vacibliyindən bəhs edilib.
Fasilədən sonra öz işini davam etdirən plenar sessiyada gündəlik qəbul edilib. APA-nın Bürosu seçilib.
Sessiyada Milli Məclisin APA-da nümayəndə heyətinin rəhbəri, qurumun İcraedici Şurasının sədri Rizvan Nəbiyev məruzə ilə çıxış edib.
Tədbirdə APA-nın Baş katibi Məhəmməd Reza Məcidi qurumun fəaliyyəti ilə bağlı hesabatı təqdim edib.
Sessiyada, həmçinin, Oman Sultanlığına tamhüquqlu üzv statusunun, Belarus Respublikasına müşahidəçi statusunun təqdim olunması ilə bağlı məsələlərə baxılıb.
Yığıncaqda “Asiyada çoxtərəfli əməkdaşlığın gücləndirilməsində parlament diplomatiyasının rolu” mövzusunda müzakirələr davam etdirilib.
Həmin gün, eyni zamanda, plenar sessiya çərçivəsində APA-nın Sosial və mədəni məsələlər, Büdcə və planlaşdırma daimi komitələrinin iclasları da keçirilib, bu komitələrin profilinə uyğun məsələlərə dair qərar layihələri müzakirə olunub.
APA-nın 15-ci plenar sessiyası öz işini sabah davam etdirəcək.
XXX
10:08
Bakıda Azərbaycanın sədrliyi ilə Asiya Parlament Assambleyasının (APA) 15-ci plenar sessiyası keçirilir.
Trend xəbər verir ki, 35 nümayəndə heyətinin, o cümlədən, ümumilikdə 280 nəfərə yaxın nümayəndənin iştirak etdiyi tədbirdə bir sıra mühüm məsələlərin müzakirəsi nəzərdə tutulur.
APA Asiya parlamentlərini birləşdirən mühüm parlament diplomatiyası platforması olmaqla yanaşı, bu cür tədbirlər həm də üzv ölkələrin qanunverici orqanları arasında müzakirələrin və dialoqun inkişafına xidmət edir.
Qeyd edək ki, artıq İndoneziya Respublikası Nümayəndələr Palatasının sədri Puan Maharani, Oman Sultanlığı Şura Məclisinin sədri Xalid Hilal Nasir Al-Maavali, Belarus Milli Assambleyası Respublika Şurasının sədri Natalya Koçanova, Özbəkistan Respublikası Ali Məclis Senatının sədri Tənzilə Narbayeva, Bəhreyn Krallığı Şura Məclisinin sədri Əli Saleh Abdulla Əlsaleh, Butan Milli Assambleyasının sədri Lunqten Dorci, İran İslam Şurası Məclisinin sədri Məhəmməd Baqir Qalibaf, Pakistan Senatının sədri Syed Yusuf Raza Gilani və Tacikistan Respublikası Ali Məclis Nümayəndələr Palatasının sədri Mahmadtoir Zokirzoda tədbirdə iştirak etmək məqsədilə Bakıya səfərə gəlib.
Tədbir çərçivəsində Milli Məclisin sədri Sahibə Qafarova ilə İndoneziya Respublikası Nümayəndələr Palatasının sədri Puan Maharani, Oman Sultanlığı Şura Məclisinin sədri Xalid Hilal Nasir Al-Maavali, Belarus Milli Assambleyası Respublika Şurasının sədri Natalya Koçanova arasında görüşlər keçirilib. Spikerin həmçinin tədbirdə iştirak edən digər parlament sədrləri ilə görüşləri nəzərdə tutulub.
Asiya Parlament Assambleyasının baş katibi Mohammad Reza Majidi çıxış edərək bildirib ki, APA Fələstin məsələsini gündəlikdə saxlayacaq.
“Onlarla fələstinli və onların uşaqları qətlə yetirilib. Bizdə az da olsa, ümid var ki, əldə edilən atəşkəs uzunmüddətli olacaq. APA məsələni gündəlikdə saxlamaq niyyətindədir”.
İran İslam Şurası Məclisinin sədri Məhəmməd Baqir Qalibaf isə öz növbəsində bildirib ki, qitənin bütün ölkələri Fələstin xalqının səsinin çatdırılmasında məsuliyyət daşıyır:
“Bölgədəki xalq müqaviməti yaxşı təchiz edilmiş hərbçilərə qarşı mübarizə apararaq rejimi strateji məğlubiyyətə uğratdı. Rejim Livan və Qəzzada uğursuzluğun ardınca boş dayanmadı. Regionda yeni sui-qəsdlər hazırlayırlar. Fələstin xalqını müqəddəratını ABŞ və digər dövlət müəyyən etməməlidir. Bu, yalnız Fələstin xalqında məxsusdur”.
Milli Məclisin sədri Sahibə Qafarova da çıxış edərək vurğulayıb ki, Beynəlxalq siyasətdə və dünyada mövcud vəziyyəti nəzərə alsaq, çoxtərəfli əməkdaşlıq məsələsi heç vaxt indiki qədər aktual olmayıb.
Onun sözlərinə görə, bu gün dünyamızın üzləşdiyi humanitar böhranlar, münaqişələr, yoxsulluq, iqlim dəyişikliyi, ayrı-seçkiliyin artması, irqçilik, ksenofobiya və islamofobiya kimi problemlər və onların öhdəsindən necə gəlmək məsələsi müasir beynəlxalq münasibətlər sisteminin səmərəliliyi məsələsini gündəmə gətirir.
Spiker Sahibə Qafarova Azərbaycanın bu problemlərə münasibətdə mövqeyi barədə məlumat verərək, deyib ki, beynəlxalq hüququn bütün norma və prinsiplərinə, beynəlxalq təşkilatların qətnamə və qərarlarına baxmayaraq, beynəlxalq səviyyədə tanınmış əraziləri 30 il ərzində qonşusu Ermənistanın işğalı altında qalan Azərbaycan təəssüf ki, bugünkü sistemin səmərəsizliyinin əsas qurbanlarından biri olmuşdur. Azərbaycan bütün bu normaları, prinsipləri və qətnamələri təkbaşına öz ərazilərini azad etməklə, ərazi bütövlüyünü və suverenliyini bərpa etməklə həyata keçirib.
Əlavə olaraq Türkiyə Böyük Millət Məclisinin üzvü Abdulkadir Emin Önen qeyd edib ki, Bakı Qafqaz region üçün önəmli mərkəzdir.
O bildirib ki, Türkiyə hər zaman Azərbaycanın yanındadır:
“Azərbaycanın ərazi bötüvlüyünün təmin edilməsi region üçün çox önəmlidir. Azərbaycan-Ermənistan sülh danışıqlarının davamlı hala gətirilməsi region üçün faydalar gətirəcək”.
