Bakı. Trend:
Beynəlxalq Münasibətlərin Təhlili Mərkəzi hər il olduğu kimi, cari ildə də əsas fəaliyyət istiqamətləri üzrə, yəni Azərbaycan, Cənubi Qafqaz regionu və dünyada baş vermiş vacib proseslərin təhlili, yüksək keyfiyyətdə araşdırma materialları, kitab və hesabatlar hazırlanması, həmçinin müvafiq olaraq Azərbaycan Respublikasının mövqeyinin beynəlxalq ictimai, siyasi və akademik dairələrə çatdırılması işini davam etdirib.
Trend xəbər verir ki, bu fikirləri Beynəlxalq Münasibətlərin Təhlili Mərkəzi İdarə Heyətinin sədri Fərid Şəfiyev bu gün keçirilən mətbuat konfransında deyib.
“Mərkəz tərəfindən ölkənin xarici siyasət gündəminin obyektiv və
yığcam təsvirini əhatə edən 12 bülleten hazırlanıb. 2025-ci ildə
Azərbaycan dilində 1 kitab nəşr edilib. Ərəb dünyası və Yaxın Şərq
regionu üzrə ixtisaslaşan əməkdaşımız Lalə Xəlilzadənin müəllifi
olduğu “Yaxın Şərqdə erməni diasporu” adlı kitabda sözügedən
regionda erməni icmasının ən geniş yayıldığı 5 ölkə üzrə erməni
diasporunun tarixi konteksti, siyasi, ictimai və mədəni fəaliyyət
istiqamətləri, təsir dairələri, potensial imkanları təhlil
edilib.
Qeyd etmək istərdim ki, başlıca hədəfimiz xarici auditoriyanın
obyektiv və düzgün məlumatlandırılması olduğu üçün kitab və hesabat
xarakterli nəşrlərimiz əsasən ingilis dilində hazırlanıb”.
O vurğulayıb ki, ümumilikdə, ingilis dilində 6 kitab hazırlanıb, “İlham Əliyev Xarici Siyasət Uğurları 2003-2023” broşürü də ingilis dilinə tərcümə edilib.
"Strateji gündəmimizin hədəf istiqamətləri üzrə “AQEM: Azərbaycanın Sədrliyinin Gücləndirilməsi”, “Azərbaycan-ABŞ münasibətləri: Strateji tərəfdaşlığa doğru yeni kursun müəyyənləşdirilməsi”, “Fransanın Ermənistan-Azərbaycan münaqişəsində rolu: tarixi baxışlar və müasir dinamika”, “Qlobal Cənub: Azərbaycan üçün faydalar” mövzularındakı kitab və hesabatları qeyd etmək istərdim.
Əlavə olaraq, yenidənqurma prosesləri zamanı üzləşdiyimiz əsas
problem - mina təhdidi ilə bağlı ADA Universiteti ilə birgə
əməkdaşlıq və Azərbaycan Respublikasının Minatəmizləmə Agentliyinin
(ANAMA) dəstəyi ilə “Azad olunmuş ərazilərdə mina problemləri ilə
mübarizə” sərlövhəli hesabat hazırlamışıq.
Bundan başqa, Azərbaycan, rus və ingilis dillərində dərc edilmiş
bülleten, təhlil və arayışların sayı ümumilikdə 214-dür.
Əməkdaşlarımızın "Commonspace", "Modern Diplomacy", "The Liberum", "Yeni Şafak", "Anadolu Ajansı", "Eurasia Review" və digər nüfuzlu nəşrlərdə məqalələri dərc olunub. Bu il xarici mediada 168, yerli mediada isə 30 məqalə dərc edilib”.
F.Şəfiyev bildirib ki, ümumilikdə, Mərkəz tərəfindən təşkil olunan və əməkdaşların fəal iştirak etdiyi tədbir sayı 49-dur:
“Bunların arasında “Yeni dünya nizamına doğru” mövzusunda 7-ci
Siyasi Forumu, “Fransa və Ermənistan-Azərbaycan münaqişəsi” ,
“İslamofobiya: Qərəzin ifşa olunması və stiqmaların dağıdılması”,
Azərbaycan-Qazaxıstan, Azərbaycan-Özbəkistan ekspert şuralarının
iclaslarını, GLOBSEC-lə birgə təşkil etdiyimiz “Orta Dəhliz: Yeni
Geosiyasi və İqtisadi Strateji Keçid?” adlı panel müzakirələrini
qeyd etmək istərdim.
Bununla yanaşı, AQEM Beyin Mərkəzləri Forumunun 13-cü sessiyası,
Türk Dövlətləri Təşkilatının Beyin Mərkəzləri Forumu,
ABŞ-Azərbaycan Beyin Mərkəzlərinin Birinci Forumu və
Azərbaycan-Türkiyə Beyin Mərkəzlərinin Birinci Forumu təşkil
olunub”.
Sədr qeyd edib ki, mərkəzin ölkə xaricində də bir sıra tədbirləri həyata keçirilib.
“9-10 dekabr tarixlərində Türkiyədə tərəfdaş təşkilatlarla birlikdə dörd, il ərzində isə ümumilikdə, 5ortaq tədbir keçirilib. Cari ilin aprel ayında Azərbaycan Respublikasının BMT yanında Daimi Nümayəndəliyi ilə birgə humanitar mina təmizləmə fəaliyyətlərinə həsr olunmuş brifinq təşkil edilib. Eyni zamanda, Praqa, Qahirə və Vyanada da ortaq tədbirlər baş tutub.
Bundan əlavə, mərkəzin əməkdaşları ABŞ, Avstriya, Mərakeş, Misir, Sinqapur və Çində tərəfdaş qurumlar tərəfindən təşkil olunan tədbirlərdə fəal iştirak edib və çıxışlar ediblər.
Cari il ərzində akademik fəaliyyətin genişləndirilməsi və ortaq layihələrin icrası məqsədilə İspaniyanın “Ágora Diplomática” platforması, Macarıstanın Danube İnstitutu, İtaliyanın Anteo Edizioni nəşriyyatı, Misirin “Hivar” Siyasi və Media Araşdırmaları Mərkəzi, İordaniya Universitetinin nəzdində fəaliyyət göstərən Strateji Araşdırmalar Mərkəzi, həmçinin İran İslam Respublikasının Xarici İşlər Nazirliyi nəzdində fəaliyyət göstərən Siyasi və Beynəlxalq Araşdırmalar İnstitutu (IPIS) ilə olmaqla, ümumilikdə 6 tərəfdaş qurumla Anlaşma Memorandumu imzalanıb”-, deyə o əlavə edib.