İyulun 25-də Bakı şəhər İcra Hakimiyyəti "Milli Birlik" Hərakatının(MBH) ünvanına göndərdiyi məktubda təşkilatın iyulun 30-da keçmiş "Qələbə" kinoteatrı qarşısında mitinq keçirmək istəyinə müsbət cavab verib.
Bu haqda MBH-yə daxil olan Azərbaycan Liberal Partiyası(ALP) İcrayə Komitəsinin sədri Əvəz Temirxan Trend ə müsahibəsində bildirib. Onun sözlərinə görə, digər seçki bloku və partiyalardan fərqli olaraq MHB aksiyaya metronun "20 Yanvar" stansiyasından yürüşlə başlamayacaq.
"Biz vaxta qənaət edərək, seçicilərə daha çox məlumat çatdırmaq üçün mitinqə birbaşa "Qələbə" meydanından başlayacağıq. Aksiyada Azərbaycanda qarşıdan gələn parlament seçkilərinin demokratik və şəffaf keçirilməsi üçün lazımi şəraitin yaradılması, ölkədə korrupsiya və rüşvətxorluq hallarının aradan qaldırılması ilə bağlı tələblər səsləndiriləcək. Mitinqdə həmçinin "Qarabağsız Azərbaycan yoxdur!", "Elmar Hüseynovun qatilləri cəzalandırılsın!" və s. kimi şüarlar səsləndiriləcək",-deyə ALP rəsmisi bildirib.
Mitinqdə iştirak etmək üçün digər siyasi partiyalara dəvət göndərilmədiyini qeyd edən Əvəz Temirxan, amma buna baxmayaraq, bütün demokratik düşərgənin təmsilçilərinin mitinqdə onlara dəstək verəcəyinə əmin olduğunu vurğulayıb.