Vətəndaş Birliyi Partiyası (VBP) əvvəllər bu partiyanın lideri olmuş eks-prezident Ayaz Mütəllibova parlament seçkisində heç bir dəstək verməyəcək. Bu barədə Trend ə VBP-nin sədri Sabir Hacıyev açıqlama verib. O bildirib ki, artıq iki ildir Ayaz Mütəllibov VBP-ni tərk edib və Azərbaycan Sosial Demokrat Partiyasına (ASDP) keçib, buna görə də həmin vaxtdan bəri onunla heç bir əlaqəsi yoxdur: "Vətəndaş Birliyi Partiyası yaranandan sonra Ayaz Mütəllibov bizə qoşuldu, sonradan isə tərk etdi. Bizim Ayaz Mütəllibovla heç bir münasibətimiz yoxdur və seçkidə də onun namizədliyini dəstəkləməyəcəyik", - deyə S.Hacıyev bildirib.
O, Ayaz Mütəllibovun deputatlığa namizədlərə verilən toxunulmazlıq hüququnun ləğv olunmasına dair fikrini bildirərkən isə qeyd edib ki, baş prokurorun belə bir hüququ var. S.Hacıyevin sözlərinə görə, dünya təcrübəsində də belə hallara tez-tez rast gəlinir. VBP sədri bildirib ki, bir şəxs cinayət məsuliyyətindən yalnız əfv fərmanı və amnistiya ilə azad oluna bilər. Deputatlığa namizəd olması isə həmin şəxsi məsuliyyətdən azad etmir: "Əgər mühacirətdə olan namizəd deputat seçilsə, artıq onun yeni statusu yaranır və deputat toxunulmazlığını yalnız parlament ləğv edə bilər. Bunun üçün hüquq-mühafizə orqanları parlamentə müraciət etməlidir. Amma deputat seçilməmişdən qabaq həmin namizəd yalnız məhkəmə hökmündən, yaxud hökm qüvvəyə mindikdən sonra həbs edilə bilər. Belə olan halda artıq namizəd artıq seçkidə iştirak edə bilməz",-deyə Sabir Hacıyev bildirib.
