"Azadlıq" bloku oktyabrın 9-da icazəsiz aksiyasını metronun "28 may" stansiyası qarşısındakı Cəfər Cabbarlı meydanında keçirməkdə israrlıdır. Bu barədə Trend ə blokda təmsil olunan Azərbaycan Xalq Cəbhəsi Partiyasının (AXCP-islahatçılar) sədrinin müavini Həsən Kərimov məlumat verib. O bildirib ki, Bakı Şəhər İcra Hakimiyyətinin şəhərin mərkəzi meydanlarında aksiya keçirilməsinə icazə verməmək barədə cavabından sonra "Azadlıq" blokunun qərarı dəyişməyib. Blok oktyabrın 9-da saat 16.00-da Cəfər Cabbarlı heykəli qarşısında aksiya keçirməyə cəhd göstərəcək.
Həsən Kərimovun sözlərinə görə, ehtimal olunan qarşıdurmaların baş verməməsi üçün müxalifətçilərlə hakimiyyət nümayəndələri arasında danışıqlar aparılması da mümkündür. Lakin bu məsələdə hakimiyyət tərəfindən təşəbbüs göstərilməlidir.
