Ermənilərin Culfada erməni qəbristanlığının dağıdılması barədə danışıqları əsassızdır, çünki Culfada ermənilər yaşamayıb və burada erməni qəbristanlığı da ola bilməz. Trend in regional müxbiri bildirir ki, tarix elmləri doktoru, AMEA Naxçıvan şöbəsinin üzvü Vəli Baxşəliyev bu barədə bəyan edib.
Onun sözlərinə görə, son illər ərzində Culfa rayonunda aparılmış tədqiqatlar göstərir ki, bu ərazidə eramızdan 4-3 min il əvvəl bizim ulu babalarımız yaşayıb - Məhəbbir, Göynük, Əməniyar kəndlərində tarixi abidələr aşkar edilib. Müəyyən edilib ki, Culfa qədim zamanlardan türk tayfalarının yaşadığı yer olub və bu ərazidə qədim sul tayfası yaşayıb. Elə Culfa rayonunun adı da bununla bağlıdır.
"Burada Fola vilayəti olub və burada türk tayfaları yaşayıb. Bu səbəbdən ermənilərin nə tarixi, nə də etnik nöqteyi nəzərdən bunu təsdiq etmək üçün əsası yoxdur"-deyə V.Baxşəliyev qeyd edib.
Alimin sözlərinə görə, Azərbaycanın ərazisi qədim albanlara məxsus olub və Alban dövləti xristian dövləti olub. "Ermənilər harda xaç gördülərsə, oranı tez özəlləşdirmək fikrinə düşürlər. Məqsəd isə beynəlxalq təşkilatların diqqətini yayındırmaq, eyni zamanda ərazi davası aparmaqdır"-deyə o bildirib.
Culfa rayonunun statistika idarəsinin rəisi Əbülfəz Qafarov bildirib ki, 70-ci illərdə Culfada 15-16 erməni ailəsi yaşayırdı, amma onları Ermənistanda dəfn edirdilər.
Culfa rayon sakinləri - 70 yaşlı Hüseynov Nəcəfqulu və 80 yaşlı Pikəxanımın sözlərinə görə, onlar hətta öz ata-babalarından belə Culfada ermənilərin yaşadığını eşitməyiblər və görməyiblər.