Azərbaycanda Ekologiya Standartlarının Monitorinqi Fondu (AESMF) və Azərbaycanda Iətəndaş Cəmiyyətinin İnkişafına Yardım Assosiasiyası (AICİYA) tərəfindən Lənkəran şəhərində "Quş qripi: şayiələr və reallıqlar" mövzusunda dəyirmi masa keçirilib. Trend in məlumatına görə, tədbirdə Lənkəran Rayon İcra Hakimiyyətinin, Kənd Təsərrüfatı, Səhiyyə, Ekologiya və Təbii Sərvətlər nazirliklərinin cənub bölgəsi üzrə nümayəndələri, yerli QHT təmsilçiləri iştirak ediblər.
Qeyd edək ki, dəyirmi Masanın keçirilməsində məqsəd "quş qripi" xəstəliyi ilə bağlı ictimaiyyətin, rayon əhalisinin və məktəblilərin maarifləndirilməsidir. Tədbirdə çıxış edən AESMF-ın sədri, professor Rauf Sultanov rayonda "quş qripi" xəstəliyi ilə bağlı əhali arasında apardıqları monitorinq barədə məlumat verib. R.Sultanov bu xəstəliklə mübarizəyə dair maarifləndirmə kampaniyasının geniş miqyasda və intensiv aparılmasını təmin etmək üçün yerli dövlət, bələdiyyə, habelə qeyri-hökumət təşkilatlarının iştirakı ilə birgə fəaliyyət proqramının hazırlanmasının vacib olduğunu qeyd edib.
Tədbirdə iştirak edən Lənkəran rayon Baytarlıq İdarəsinin rəisi Kamal Abdinov quş qripi ilə bağlı rayon ərazisində hər birində 9 nəfər olmaqla 5 qrup yaradıldığını və bu qruplara müvafiq orqanların nümayədələrinin daxil edildiyini deyib. Onun sözlərinə görə, çöl quşlarının ovlanılmasına qadağa qoyulub və tələfatın baş verməməsi üçün bütün qüvvələr tam səfərbər olunub. Qeyd edək ki, Lənkəran Dövlət Universitetində tələbələrə layihə çərçivəsində mühazirələr oxunub və əyani vasitələr paylanılıb. Hər iki qurumun təşkilatçılığı ilə keçirilən tədbirlər bundan sonra Gəncə və Xaçmaz şəhərlərində davam etdiriləcək.
