Gəncədə məskunlaşmış 3275 Kəlbəcər köçkünlərindən bir qisminə yaxın vaxtlarda torpaq sahəsinin verilməsi gözlənilir.
Kəlbəcər rayon İcra hakimiyyəti başçısının birinci müavini Akif Əsgərov Trend in Qərb bürosuna bu haqda məlumat verib. Onun sözlərinə görə, onlara müraciət edən bir qrup məcburi köçkünün ərizələri nəzərə alınmaqla, Azərbaycan Dövlət Qaçqın Komitəsinə müvafiq torpaq sahəsinin ayrılması üçün müraciət edilib: "Xanlar rayon icra başçısı ilə birgə ünvanlanmış müraciətdə həmin rayonun Haçıməlik kəndi ərazisində 30 ha torpaq sahəsinin ayrılması xahiş olunub".
Artıq razılıq əldə olunduğunu deyən A. Əsgərov Torpaq və Xəritəçəkmə Komitəsi tərəfindən adıçəkilən ərazinin ayrılması üçün göstəriş verildiyini də bildirdi. Müsahibimiz əgər burada qəsəbənin tikilməsi üçün dövlət tərəfindən vəsait ayrılmazsa, torpaq sahələrinin ehtiyacı olan təxminən 500 ailə arasında bölüşdürüləcəyini əlavə etdi: "Üzvlərinin sayından asılı olaraq hər ailəyə 4-6 sot torpaq sahəsi veriləcək".