Gələn il qonşu ölkələrdən Naxçvana idxal olunan taxıl ehtiyatının həcmi azala bilər. Trend in Naxçıvan bürosu xəbər verir ki, buna səbəb Naxçıvan Muxtar Respublikasının rayonlarında taxıl istehsalının həcminin artmasıdır.
Qeyd edək ki, regionda yaşayan əhalinin çörəklə təminatı üçün il ərzində 80 min tona yaxın buğda tələb olunur. Tələbatı ödəmək üçün Naxçıvan MR Kənd Təsərrüfatı Nazirliyi qonşu ölkələrdən--İran və Türkiyədən taxıl və un məmulatları idxalının həcmini azaltmağı düşünür. Adıçəkilən təşkilat bununla bağlı daxili istehsalın həcmini artırmaq istiqamətində bir sıra tədbirlər həyata keçirir.
Əhalinin çörək məhsullarına olan daxili təlabatını ödəmək üçün hazırda akademik C.Əliyevin yetişdirdiyi "Bərəkətli", "Nurlu-99", "Qiymətli", "Əlincə-84", "İstiqlal" sortlarından geniş istifadə olunur. Hazırda xarici ölkələrdə istehsal olunan müxtəlif markalı müasir kənd təsərrüfatı texnikası güzəştli qiymətlə sahibkarlara satılır.
Yaxın beş ildə isə Naxçıvanda əhalinin çörək məsullarına olan ehtiyacı tamamilə daxili imkanlar hesabına ödəniləcək. Son illərin nəticəsi belə deməyə əsas verir. Məlumat üçün deyək ki, son beş ildə Naxçıvan Muxtar Respublikasında taxıl istehsalı iki dəfəyədək artıb. Belə ki, əgər 2000-ci ildə 54,4 ton məhsul istehsal olunubsa, ötən il bu rəqəm 93,2 min tona çatdırılıb.
...