Naxçıvanda istilik sistemləri qışa hazırlıq vəziyətindədir. Trend in Naxçıvan bürosu xəbər verir ki, artıq bütün qazanxanalarda cari təmir işləri başa çatdırılıb.
Naxçıvan Şəhər İstilik Təsərrüfat İdarəsinin rəisi Seyfəddin Bağırov Trend ə müsahibəsində bildirib ki, qışa hazırlıqla bağlı Naxçıvan şəhərində 19 qazanxanada təmir işləri aparılaraq, istilik xətləri sınaqdan keçirilib. "Bu il həm də fəaliyyətini xeyli müddətdir dayandırmış 27№-li qazanxana işə salınıb ki, həmin qazanxana 12 inzibati binada 432 mənzili istiliklə təmin eəcək. Yaxın günlərdə sistemə daha 2 yaşayış binası və bir məktəbəqədər tərbiyə müəssisəsi qoşulacaq"--Seyfəddin Bağırov əlavə edib.
Qeyd edək ki, əvvəlki illərdə Naxçıvanda istilik sistemlərinin işə salınması üçün qazanxanalarda daha çox mazutdan istifadə edilirdisə, bu il 19 qazanxananın hamısı mavi yanacaqla təmin ediləcək. Bu isə Naxçıvan şəhərində 103 yaşayış binasını əhatə etməklə 5047 mənzilin fasiləsiz istiliklə təmin olunmasına imkan verir.