Cari ilin 11 ayı ərzində Naxçıvan MR-də 19 yol-nəqliyyat hadisəsi qeydə alınıb. Trend in Naxçıvan Bürosu Naxçıvan MR DİN-in Dövlət Yol Polisi Şöbəsinin məlumatına istinadən xəbər verir ki, 2005-ci ilin yekunları ilə müqayisədə cari ilin yanvar-noyabr aylarına görə yol-nəqliyyat hadisələri say etibarilə 1 dəfə artıb.
Qeyd olunan 19 yol nəqliyyat hadisəsi zamanı 14 ölən və 22 yaralı olub. Bu il həm də regionda qeydiyyatda olanan avtomobillərin 69,1%-i texniki baxışdan keçirilib. Aparılan axtarış tədbirləri nəticəsində isə oğurlanmış 2 ədəd avtomobil şöbənin əməkdaşları tərəfindən aşkar edilib.
Məlumatda o da bildirilir ki, Naxçıvan MR DİN-in DYP şöbəsi tərəfindən "Yol hərəkəti qaydalarına riayət edək" devizi altında keçirilən təhlükəsizlik aylığı artıq başa çatıb. Tədbir çərçivəsində şöbənin əməkdaşları noyabr ayının 15-dən dekabrın ortalarınadək müəssisə və təşkilatlarda, avtomobil məktəblərində, eləcə də orta ümumtəhsil məktəblərində maarifləndirmə tədbirləri həyata keçiriblər.
