Avropa Şurası Parlament Assambleyasının (AŞ PA) qış sessiyası çərçivəsində qurumun Monitorinq Komitəsinin iclası keçiriləcək və həmin toplantıda Azərbaycanın Avropa Şurası qarşısında götürdüyü öhdəliklərin yerinə yetirilməsi məsələsi müzakirə olunacaq.
Bu barədə Trend ə ekskülziv açıqlamasında Azərbaycanın AŞ PA-dakı nümayəndə heyətinin üzvü, millət vəkili Gültəkin Hacıyeva məlumat verib.
Xatırladaq ki, AŞ PA-nın qış sessiyası 2007-ci ilin yanvar ayında Fransanın Strasburq şəhərində qurumun mənzil qərərgahında keçiriləcək.
G.Hacıyevanın sözlərinə görə, Monitorinq Komitəsinin iclasında AŞ PA-nın Azərbaycan üzrə həmməruzəçiləri Toni Lloyd və Andres Herkel hazırladıqları məruzəni toplantı iştirakçılarının nəzərinə çatdıracaqlar.
"İclasda layihə şəkilində olan qətnaməyə əlavə olunan izahatla bağlı müzakirələr keçiriləcək. Prosedur qaydalara görə AŞ PA-nın iclaslarında müzakirə olunacaq məsələlərə ilk öncə müvafiq komitələrdə baxılır. Komitədə bəyənildikdən sonra məsələ büroda gündəliyə daxil edilərək deputatların müzakirəsinə verilir." deyə, Azərbaycanın AŞ PA-dakı nümayəndə heyətinin üzvü bildirib.
G.Hacıyeva vurğulayıb ki, Azərbaycan üzrə həmməruzəçilərin hazırladıqları məruzə üzərində iş aparılır və sənəd ilkin variantda mövcuddur. Məruzə Monitorinq Komitəsinin dekabrda keçirilən iclasında deputatların diqqətinə çatdırılıb: "Azərbaycanın nümayəndə heyəti həmməruzəçilərlə əməkdaşlığı davam etdirir."
Qeyd edək ki, AŞ PA-nın aprel ayında keçiriləcək yaz sessiyasında Azərbaycanın qurum qarşısında götürdüyü öhdəliklərlə bağlı müzakirələr aparılacaq.