Ötən il Naxçıvan MR İnsan Hüquqları üzrə Müvəkkilin (Ombudsmanın) ünvanına 50 müraciət daxil olub. Bu barədə Trend in Naxçıvan Bürosu adıçəkilən qurumun mətbuat üçün açıqladığı hesabat xarakterli məlumata istinadən xəbər verir.
Məlumatda qeyd olunur ki, ötən müddət ərzində vətəndaşların hüquqarı diqqət mərkəzində saxlanılıb, oktyabr ayının 6-da Muxtar Respublikanın rayonlarında keçirilən bələdiyyə seçkilərini müşahidə zamanı ciddi qanun pozuntuları aşkar edilməyib.
Müvəkkil ötən il Naxçıvan MR Ədliyyə nazirliyi tabeliyində olan və Kəngərli rayonunda yerləşən cəzaçəkmə müəssisələrində olub, bu zaman bəzi məhkumların müraciətləri nəzərə alınaraq qanunamüvafiq qaydada cəzalarının bir hissəsini çəkməsi, islah olunması və ailə vəziyyətləri nəzərə alınmaqla cəzalarının qalan hissəsinin çəkməkdən azad edilməsi barədə müvafiq strukturlara müraciət ünvanlanması nəticəsində 5 nəfər məhkumun cəzalarının çəkilməmiş hissəsini çəkməkdən azad edilib.
Məlumatda o da bildirilir ki, ötən ildə Ombudsman təsisatının Naxçıvan şəhərinin mərkəzi prospektində müvafiq bina ilə təmin edilməsi əhalinin Müvəkkilə asanlıqla müraciət etməsinə imkan verir.
