Azərbaycan, Bakı / Trend müxbir İ.Əlizadə/ Hakim Yeni Azərbaycan Partiyasının (YAP) İdarə Heyətinin martın 7-də keçirilən iclasında sabiq səhiyyə naziri Əli İnsanovun məhkəmədə səsləndirdiyi fikirlər müzakirə olunub. Bu barədə YAP mətbuat xidmətindən məlumat verilib. Sabiq səhiyyə nazirinin məhkəməni siyasi çəkişmələr meydanına çevirmək niyyəti, siyasi riyakar mövqeyi pislənilib, onun həqiqətə uyğun olmayan bəyanatları törətmiş olduğu ağır cinayətlərdən diqqəti yayındırmaq, eyni zamanda həbsinə siyasi don geyindirməyə uğursuz cəhd kimi qiymətləndirilib. Qeyd olunub ki, Əli İnsanovun vaxtilə üzvü olduğu partiya haqqında bu gün səsləndirdiyi fikirlər açıq - aşkar böhtan olub, siyasi şantajdan başqa bir şey deyildir.
"Sabiq nazirin vaxtı ilə hakimiyyətin və YAP-ın uğurları barədə pafoslu nitqləri və bu gün səsləndirdiyi çürük ittihamlar Əli İnsanovun saxta mahiyyətinin parlaq nümunəsidir. Əli İnsanovun bu gün müttəhimlər kürsüsündə əyləşməsi, iddialarının əksinə olaraq heç də siyasi xarakter daşımır, vəzifə səlahiyyətlərindən sui-istifadə edərək dövlət əmlakını mənimsəmə və törətdiyi digər cinayət xarakterli əməllərə görə ittiham olunması ilə əlaqədardır", -deyə İdarə Heyətinin üzvləri bildiriblər.
Qeyd olunub ki, YAP-nın bütün üzvləri Əli İnsanovun bu gün səsləndirdiyi iftiraların iyrənc niyyətləri hədəf seçdiyini bildirir və sabiq nazirin cinayət əməllərini, onun Heydər Əliyev yoluna və partiyanın ideyalarına xəyanətini kəskin pisləyir.
İclasda YAP-ın rayon, şəhər təşkilatlarının növbəti hesabat-seçki yığıncaqlarının gedişi və partiya həyatı ilə bağlı digər cari məsələlər müzakirə edilib.
Qeyd edək ki, YAP 1992-ci ildə Naxçıvanda yaradılıb. Partiyanın ilk sədri mərhum eks-prezident Heydər Əliyev olub. 14 ildi hakim partiya olan YAP-ın indiki sədri prezident İlham Əliyevdir.
