Azərbaycan, Bakı / Trend müxbir S.İlhamqızı/ Müxalifətyönlü "Bizim Azərbaycan" blokunun yeni sədri seçiləcək. Bu barədə blokun indiki sədri Vüqar Bəyturan bazar ertəsi məlumat verib.
"Bizim Azərbaycan" blokunun Sədrlər Şurasının iclasında bir sıra məsələlər - jurnalistlərin 12 iyunda keçirəcəyi yürüş-mitinq, laçınlıların hüquqlarının müdafiəsi məsələsi, blokun sədrliyinə keçiriləcək seçkilər barədə müzakirələr aparılıb.
Blokda təmsil olunan partiyaların Azərbaycan jurnalistlərinin 12 iyun aksiyasında iştirak etməsinə qərar verilib. Həmçinin sədr seçkisinin vaxtı təyin olunub, avqustun 25-də blokun yeni sədrinin seçilməsinə qərar verilib.
Bəyturan bildirib ki, Əsasnaməyə görə, "Bizim Azərbaycan" bloku sədrinin seçilməsi üçün üç ay seçki prosesi davam etməlidir. Üç ay qalmışa qədər isə namizədlər irəli sürülməlidir. Sədrliyə namizədlər artıq müəyyənləşib - Türk Millətçi Partiyasının sədri Vüqar Bəyturan və Azad Azərbaycan Partiyasının sədri Həsən Həsənov. Bu gündən onların seçki kampaniyası başlanır. Avqustun 25-də Sədrlər Şurasının iclasında gizli səsvermə yolu ilə seçki olacaq.
Blokun Sədrlər Şurası həmçinin laçınlıların hüquqlarının kürd mənşəli vəkil Kərim Yıldız tərəfindən müdafiə olunmasına etirazını bildirən bəyanat verib. Blok hesab edir ki, həmin şəxsin əməlləri Azərbaycanda etnik zəmində separatçılığa rəvac verə bilər.
Müxalifətyönlü "Bizim Azərbaycan" siyasi blokunda səkkiz partiya təmsil olunur.
