Azərbaycan, Bakı /müx. Trend K.Ramazanova/ ATƏT-in Bakı ofisi Azərbaycandakı prezident seçkiləri ilə bağlı layihə gerçəkləşdirməyi planlaşdırır. Bu barədə ATƏT-in Bakı ofisi rəhbərinin müavini Robin Sivord məlumat verib.
Onun sözlərinə görə, layihə özündə meriyanın fəaliyyəti, idarəetmənin təkmilləşdirilməsi, 2003-cu il prezident seçkilərindən sonra edilən tövsiyələrin icrası, namizədlərin qeydiyyatı kimi aktual məsələləri əks etdirəcək.
O həmçinin qeyd edib ki, çox şey layihə üçün ayrılan resurslardan asılı olacaq.
Sivord bildirib ki, yaxın vaxtlarda Azərbaycanda ATƏT-in bir neçə regional ofisi açılacaq.
"Lənkəranda qadın mərkəzinin, bir sıra bölgələrdə antikorrupsiya mərkəzlərinin açılacağı gözlənilir" - deyə o vurğulayıb.
Sivordun sözlərinə görə, təşkilat Azərbaycan iqtisadiyyatının təkcə karbohidrogen ehtiyatlara əsaslanmasını istəmir, digər sahələri də inkişaf etdirmək lazımdır.