Azərbaycan, Bakı, 02 aprel / Trend , müxbir K.Zərbalıyeva/ Azərbaycanda mətbuat nümayəndələrinin həbsinə etiraz olaraq aclıq aksiyası keçirən beş nəfərdən biri aksiyanı dayandırıb. ""Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayevə dəstək məqsədilə aclıq aksiyasına qoşulmuş "Bizim Yol" qəzetinin əməkdaşı Natiq Cavadlı aclığı dayandırıb", - deyə çərşənbə günü Trend a açıqlamasında "Gündəlik Azərbaycan" qəzetinin şef-redaktoru Şahvələd Çobanoğlu deyib.
Çobanoğlu bildirib ki, Cavadlının mədəsində kəskin ağrılar başladığından və qan təzyiqi aşağı düşdüyündən aksiya iştirakçıları ondan aclığı dayandırmasını xahiş edir.
12 saylı Cəzaçəkmə Müəssisəsində saxlanılan "Gündəlik Azərbaycan" və "Realnıy Azerbaydjan" qəzetlərinin baş redaktoru Fətullayev martın 26-dan həbsdə aclığa başlayıb. Baş redaktor işinə ədalətli və qərəzsiz baxılmasını, həbsdə olan həmkarlarının azadlığa çıxmasını tələb edir, Avropa Şurası və ATƏT-in siyasi məhbus məsələsində konkret müdafiə mexanizmləri ortaya qoymasını istəyir. Fətullayevə dəstək məqsədilə "Yeni Müsavat" qəzetinin redaksiyasında "Gündəlik Azərbaycan" qəzetinin şef-redaktoru Şahvələd Çobanoğlu, "Yeni Müsavat" qəzetinin redaktoru Zahid Səfəroğlu və qəzetin əməkdaşı Elşən Balaxanlı, "Yeni Müsavat" qəzetinin əməkdaşı Zamin Hacı və başqaları açılıq aksiyası keçirirlər.
Jurnalistlərin aclıq aksiyasına siyasi partiyaların nümayəndələrinin də qoşulması qərara alınıb. Artıq millət vəkili Pənah Hüseyn, Azərbaycan Liberal Partiyasının sədr əvəzi Əvəz Temirxan aclığa qoşulacağını bildirib.
ADP sədri Sərdar Cəlaloğlu Trend a açıqlamasında bildirib ki, jurnalistlərin etiraz aksiyasına xaricdə yaşayan azərbaycanlıların da dəstək verməsi, onların beynəlxalq təşkilatlara müraciətlər etməsi istiqamətində iş aparılmasına qərar verilib.
Fətullayev Cinayət Məcələsinin terororçuluqla hədələmə (214.1-ci), qulluq möveyindən istifadə etməklə milli, irqi, sosial və ya dini düşmənçiliyin salınması (283.2.2-ci) və vergidən yayınma(213.2.2) maddələri ilə təqsirli bilinərək, məhkəmənin hökmü ilə 8 il 6 ay azadlıqdan məhrum edilib.
Azərbaycanda peşə fəaliyyəti ilə bağlı 3 jurnalist- "Azadlıq" qəzetinin baş redaktoru Qənimət Zahid, onun qardaşı, qəzetin əməkdaşı Mirzə Sakit və "Gündəlik Azərbaycan" və "Realnı Azerbaydjan" qəzetlərinin baş redaktoru Eynulla Fətullayev həbsdədir.
Məqalənin müəllifi ilə [email protected] ünvanı ilə əlaqə saxlaya bilərsiniz