Azərbaycan, Bakı, 21 aprel / Trend , müxbir E.Hüseynli/ Azərbaycanda ilk nüvə tədqiqat reaktrının tikintisi üçün aprelin 28-də BMT-nin Atom Enerjisi üzrə Beynəlxalq Agentliyinin (MAQATE) Vyanada yerləşən Baş Ofisində növbəti müzakirələr başlayacaq. Bu barədə bazar ertəsi Trend -a Azərbaycan Milli Elmlər Akademiyasının (AMEA) Radiasiya Problemləri İnstitutunun direktoru Adil Qəribov məlumat verib.
İlk nüvə tədqiqat reaktrının tikintisi üçün Azərbaycan hökuməti razılığını verib. Azərbaycanda bu obyektin tikilməsinə 2009-cu ildə başlanması və 2010-cu ildə başa çatdırılması nəzərdə tutulur.
Azərbaycanda 30-35 MVt gücündə nüvə reaktrı tikilməsi planlaşdırılır.
Ötən ilin dekabrında Azərbaycanda ilk nüvə tədqiqat reaktrının tikilməsi MAQATE-də müzakirə edilib.
Qəribov deyib ki, MAQATE-də keçirilən müzakirələrdə Azərbaycandan 5 nümayəndə iştirak edəcək. Azərbaycan nümayəndə heyətinə AMEA-nın Radiasiya Problemləri İnstitutundan və Fövqəladə Hallar Nazirliyindən mütəxəssislər daxildir. Müzakirələr zamanı nüvə tədqiqat reaktrının gücü, reaktrın növü, ayrılacaq vəsaitin miqdarı dəqiqləşdiriləcək.
Azərbaycan Yaşıllar Partiyası atom texnologiyasının insan sağlamlığına və ekologiyaya ciddi ziyan vurduğunu əsas gətirərək onun tətbiqinin əleyhinə çıxış edir. Partiya hesab edir ki, Azərbaycan alternativ enerjinin digər növlərindən, külək, su, günəş enerjisindən istifadə etməlidir.
MAQATE-də müzakirələr aprelin 30-da başa çatacaq.
Məqalə müəllifi ilə əlaqə ünvanı: [email protected]
