Azərbaycan, Bakı, 23 aprel/ Trend , müxbir İ.Əlizadə/Azərbaycan vətəndaşları ən çox ədliyyə və məhkəmə orqanlarından narazıdır. "2008-ci ilin ilk üç ayı ərzində parlamentin İnsan hüquqları daimi komissiyasına daxil olan ərizə, şikayət və müraciətlərin çoxu ədliyyə və məhkəmə orqanlarının fəaliyyəti ilə bağlıdır. Komissiyaya daxil olan şikayətlərdən 63-ü araşdırılması və baxılması üçün ədliyyə və məhkəmə orqanlarına göndərilib", -deyə çərşənbə günü Trend -a açıqlamasında Azərbaycan Parlamentinin İnsan hüquqları daimi komissiyasının sədri Rəbiyyət Aslanova bildirib.
2008-ci ilin ilk üç ayı ərzində Parlamentin İnsan hüquqları daimi komissiyasına insan hüquqlarının pozulması ilə bağlı vətəndaşlar tərəfindən göndərilən 266 ərizə, şikayət və müraciət daxil olub.
Daxil olan ərizə şikayət və müraciətlərdən 63-ü ədliyyə və məhkəmə, 32-i yerli icra hakimiyyəti, 29-u prokurorluq, 10-u polis orqanlarına, 6-sı Müdafiə Nazirliyi və hərbi komissarlıqlara, 5-i təhsil idarələrinə, 3-ü Səhiyyə Nazirliyinə, 65 ərizə və şikayətlər isə digər nazirliklərə, komitə və şirkətlərə göndərilib, 53-ü isə dəfələrlə təkrar və anonim olduğundan heç bir orqana göndərilməyib. Komissiya 69 ərizəni nəzarətə götürüb və göndərilən orqanlardan cavab alıb.
Parlamentin 2007-ci ilin payız sessiyası dövründə (oktyabrın-dekabr ayları) İnsan hüquqları daimi komissiyasına 972 ərizə, şikayət və müraciət daxil olub. Onlardan 135-i ədliyyə və məhkəmə orqanlarından olub.
"2008-ci ildə komissiyaya daxil olan şikayətlər azalıb", -deyə komissiya sədri əlavə edib.
Məqalə müəllifi ilə əlaqə ünvanı: [email protected]