Azərbaycan, Bakı, 15 may/ Trend , müxbir İ.Əlizadə/ Azərbaycan Parlamentinin yaz sessiyasında "Təhsil haqqında" yeni qanun layihəsi qəbul olunmayacaq. "Yaz sessiyası başa çatana qədər "Təhsil haqında" yeni qanun layihəsini ikinci oxunuşda parlamentin müzakirəsinə çıxarmağa çalışacağıq. Lakin qanun layihəsinin qəbul olunması parlamentin payız sessiyasına qalacaq", - deyə cümə axşamı Trend -a eksklüziv açıqlamasında Azərbaycan Parlament Aparatının rəhbəri Səfa Mirzəyev bildirib.
Azərbaycanda hazırda qüvvədə olan "Təhsil haqqında" Qanun 1992-ci ildə qəbul olunub. 1995-ci ildən yeni qanun layihəsinin hazırlanmasına başlanılıb. Lakin parlamentlə Tələbə Qəbulu üzrə Dövlət Komissiyası, universitetlər, Milli Elmlər Akademiyası, Təhsil, Maliyyə və Vergilər nazirlikləri arasında fikir ayrılığı olduğuna görə, qanun layihəsi qəbul olunmayıb.
2007-ci ilin dekabrın 29-da parlament qanun layihəsini birinci oxunuşda qəbul edib. İkinci oxunuşda müzakirəyə çıxarılması üçün layihə əvvəlcə Parlamentin Elm və təhsil məsələləri dami komissiyasında müzakirə olunmalıdır.
Yeni qanun layihəsinin qəbulu parlamentin yaz sessiyasının iş planına daxil edilmişdi.
Mirzəyev qeyd edib ki, qanun layihəsinin ikinci oxunuşda Parlamentdə müzakirə olunacağı tarix dəqiqləşməyib.
Daxili Nizamnaməyə görə, Azərbaycan parlamentinin yaz sessiyası mayın sonunda başa çatır. Payız sessiyası oktyabrın birində başlanır və dekabrın 30-da başa çatır.
Məqalə müəllifi ilə əlaqə ünvanı: [email protected]