Azərbaycan, Bakı, 05 iyun / Trend , müxbir K.Zərbalıyeva/ Azadlıq Hərəkatçıları Birliyinin "Azadlıq" qəzetinə qarşı qaldırdığı iddia üzrə cümə axşamı Bakının Yasamal rayon məhkəməsində hazırlıq iclası keçirilib.
Birlik qəzetin Azərbaycan Xalq Cəbhəsinin (AXC) təsisçiliyindən çıxarılaraq kollektivin təsisçiliyinə verilməsinin qeyri-qanuni hesab olunması, "Azadlıq" qəzetinin indiki rəhbərlik və kollektivlə istehsalına və yayımına xitam verilməsini tələb edir.
İddiada qeyd olunur ki, "Azadlıq" qəzeti AXCP-nin orqanı kimi deyil, qəzetin kollektivinin orqanı kimi fəaliyyət göstərir.
"Heç kim haqq verə bilməz ki, azadlıq hərəkatı fəallarının yaratdığı "Azadlıq" qəzeti Qənimət Zahid, Mirzə Sakit, Aqil Xəlil kimi şər-böhtan bahadırlarının, Ruslan Bəşirli, Eynulla Fətullayev kimi düşmənlə separatçılıq edənlərin tribunasına çevirilsin", - deyə iddiada vurğulanır.
İddiaçı "Azadlıq" qəzetinin indiki rəhbərinin AXC qurucuları və həmin qəzetin təsisçilərinə vurduğu mənəvi zərərə görə, mətbuat vasitəsilə üzv istəməsini, AXC qurucularına, cəmiyyətə vurulan mənəvi zərərə görə isə 150 min manat məbləğində kompensasiyanın ödəməsini tələb edir.
Hazırlıq iclasında qəzet rəhbərliyi vəkilləri Elçin Sadıqovun ABŞ-da olduğunu əsas gətirərək iclasın təxirə salınmasını xahiş edib.
Qəzet rəhbərliyinin vəsatəti təmin olunub və hazırlıq iclası iyulun 1-dək təxirə salınıb.
"Azadlıq" qəzetinin direktoru Azər Əhmədov iddianı siyasi hakimiyyətdən gələn sifariş kimi qiymətləndirib və hesab edir ki, bu qəzetə qarşı başlamış "Səlib yürüşü"nün tərkib hissəsidir.
"Azadlıq" qəzetinin iki əməkdaşı məhkəmənin hökmü ilə məhkum olunub, digər əməkdaşı Aqil Xəlilin həyatına isə iki dəfə sui-qəsd edilib.
"Azadlıq" qəzeti 1989-cu ildə Azərbaycan Xalq Cəbhəsinin orqanı kimi yaradılıb. 1993-cü ildə redaksiya kollektivi də təsisçi olub. Xalq Cəbhəsi partiyaya çevriləndən bir neçə il sonra qurum qəzetin təsisçiliyindən imtina edib. Bundan sonra qəzetə redaksiya kollektivi təsisçilik edib.
Azadlıq Hərəkatçıları Birliyi 2006-cı ilin yanvarında təsis edilib.
Müəlliflə əlaqə saxlamaq üçün elektron ünvan - [email protected]
