Azərbaycan, Bakı, 06 iyun / Trend , müxbir K.Zərbalıyeva/ Hacıqabul rayonunun Rəncbər kəndinin bir qrup torpaq mülkiyyətçisinin "BP Azərbaycan", Dövlət Neft Şirkəti və Dövlət Torpaq və Xəritəçəkmə Komitəsinə qarşı iddiası qismən təmin olunub.
Neft kəmərlərinin tikintisi ilə əlaqədar mülkiyyətçilər torpaqlarından istifadə məhdudlaşdığından məhkəməyə müraciət edərək vurulmuş maddi ziyana görə kompensasiya ödənilməsini tələb ediblər.
Əmək Hüquqlarının Müdafiəsi Liqasının yaydığı məlumata görə, 2006-cı ilin yayından başlanan məhkəmə çəkişməsinin əsas mərhələsi başa çatıb.
Şirvan Apellyasiya Məhkəməsi torpaq mülkiyyətçilərinə əldən çıxmış fayda və mülkiyyətdə olan torpağa hüquqların məhdudlaşdırılması ilə bağlı kompensasiyanın verilməsi barədə qərar çıxarıb.
Məhkəmə iddiaçıların zərərin ödənilməsi ilə bağlı tələb etdikləri məbləği deyil, məhkəmə ekspertizasının müəyyən etdiyi zərərin ödənilməsi barədə qərar qəbul edib.
Mülkiyyət sahibləri Avropa İnsan Hüquqları Məhkəməsinə 1 saylı protokolun 1-ci maddəsinə (mülkiyyət hüququ ) və Konvensiyanın 6-cı maddəsinin (ədalətli məhkəmə araşdırması hüququ) pozuntusu ilə bağlı şikayət verəcəklər.
Liqa bildirir ki, təşkilatın iki ildən artıq davam etdirdiyi bu proses ölkədə neft əməliyyatları başlandıqdan sonra neft əməliyyatlarının təsirləri ilə bağlı iddiaçıların xeyrinə çıxarılmış ən uğurlu qərardır.
Yaxın vaxtlarda torpaq mülkiyyətçiləri "Azəriqaz" Dövlət Şirkətinə qarşı analoji məhkəmə prosesinə başlayacaq.
Müəlliflə əlaqə saxlamaq üçün elektron ünvan - [email protected]
