Azərbaycan, Bakı, 18 iyun/ Trend , müxbir C.Babayeva/ Erməni əsilli Van Bayburtun Gürcüstan prezidenti Mixail Saakaşvilinin millətlərarası məsələlər üzrə müşaviri təyin olunması bu ölkədə yaşayan azərbaycanlıların narazılığına səbəb olub. "Gürcüstan azərbaycanlılarının problemləri ilə bağlı erməni əsilli Van Bayburta müraciət edəcəkləri qeyri-mümkündür. Bayburt nəinki ermənilərin, hətta Gürcüstanda yaşayan digər milli azlıqların problemlərini dövlət səviyyəsində qaldırıb həll etməyə qadir olan şəxs deyil", - deyə çərşənbə günü Tbilisidən telefonla Trend -a "Qeyrət" Xalq Hərəkatının sədri Əlibala Əsgərov bildirib.
Trend -un arayışı: Erməni əsilli Bayburt Gürsütan parlamentinin iki çağırışının (1999-2004; 2004-2008) deputatıdır. Gürcüstanda nəşr olunan erməni dilli "Vrastan" qəzetinin baş redaktorudur. İyunun 13-də Gürcüstan prezidenti Saakaşvilinin sərəncamı ilə Bayburt prezidentin millətlərarası məsələlər üzrə müşaviri təyin olunub.
Əsgərovun sözlərinə görə, Bayburt Gürcüstan hakimiyyətinin qərarlarından və proqramlarından kənara çıxan deyil. "Gürcüstan hakimiyyəti ölkədə yaşayan milli azlıqların problemləri ilə məşğul olacaq qeyri-millətin nümayəndəsini müşavir təyin etmək adı altında yalnız Bayburtu qoya bilərdi", - deyə o bildirib.
Hərəkat sədri Bayburtla yanaşı Azərbaycan əsilli şəxsin də millətlərarası məsələlər üzrə müşavir təyin olunacağına inanmır. "Bu məsələlərlə bağlı prezidentin yalnız bir müşaviri təyin olunur. Gürcüstan hakimiyyəti yalnız ermənilərin deyil, azərbaycanlıların da dəstəyini qazandığına görə, digər dövlət strukturlarına azərbaycanlıların təyin olunacağına ümidvaram", - deyə Əsgərov bildirib.
Gürcüstan Azərbaycanlıları Konqresinin (GAK) həmtəsisçisi, "Gürcüstan mənim vətənimdir" İctimai Birliyinin sədri Əli Babayevin çərşənbə günü Trend -a bildirdiyinə görə, Gürcüstanda keçirilmiş parlament seçkisindən öncə (21 may) Bayburtun millətlərarası məsələlər üzrə prezident müşaviri təyin olunacağı barədə məlumatı olub. "Buna ilk olaraq etirazını bildərin GAK Gürcüstan prezidentinə milli azlıqların şurasının yaradılması təklifi ilə müraciət etmişdi. GAK həmin şurada Gürcüstanda yaşayan bütün milli azlıqların nümayəndələrinin təmsil olunması təklifini irəli sürmüşdü. Təəssüf ki, milli azlıqların məsələləri ilə yalnız bir milli azlığın nümayəndəsi məşğul olacaq", - deyə Babayev bildirib.
Məqalə müəllifi ilə əlaqə saxlamaq üçün ünvan - [email protected]
