Azərbaycan, Bakı, 18 iyun/ Trend , müxbir E.Babayev/ Azərbaycan jurnalistlərinin V qurultaynına hazırlıq işləri yekunlaşıb. Bunu qurultayın keçirilməsi üzrə Təşkilat Komitəsinin çərşənbə günü keçirilən sonuncu iclasında Mətbuat Şurasının sədri Əflatun Amaşov deyib.
Trend -un arayışı: Jurnalistlərin qurultayı iyunun 20-də olacaq. Toplantıda, əsasən, təşkilati məsələlərə yer ayrılacaq və quruma yeni sədr seçiləcək, yeni İdarə Heyəti formalaşacaq. Mətbuat Şurasının Nizamnaməsinə də dəyişikliklər olunacaq.
Amaşov bildirib ki, ilkin seçki mərhələsində Mətbuat Şurasının təsisçisi olan 155 KİV-dən 138-nə məktub və gizli səsvermə bülletenləri çatdırılıb. 17 təsisçinin Şura ilə əlaqələri itdiyindən, bu, mümkün olmayıb. 128 təsisçi qurultaya hazırlıq üzrə işçi qrupuna qurultayda iştirak edəcək nümayəndələrinin adları yazılmış məktubları və prosedur qaydalara uyğun olaraq, içərisində gizli səsvermə bülletenləri olan möhürlənmiş zərfləri təqdim edib. 10 təsisçi ünvanlanmış məktuba cavab verməyib. O əlavə edib ki, müxtəlif KİV-in təqdim etdikləri blanklarda 123 jurnalist, 132 ictimaiyyət nümayəndəsi İdarə Heyətinə namizəd kimi göstərilib. İşçi qrup Təşkilat Komitəsinə onlardan ən çox səs toplayanlarının adlarının ölkə jurnalistlərinin V qurultayının səsvermə bülletenlərinə daxil edilməsi barədə təqdimat ünvanlayıb.
İclasda işçi qrupunun təqdimatı Təşkilat Komitəsinin üzvləri tərəfindən müzakirə olunaraq təsdiqlənib. İşçi qrupuna 27 jurnalist və 18 ictimaiyyət nümayəndəsinin adları qeyd edilmiş müvafiq blanklar hazırlamaq tapşırığı verilib.
Məqalə müəllifi ilə əlaqə ünvanı: [email protected]
