Azərbaycan, Bakı, 19 iyun/ Trend , müxbir E.Babayev/ Azərbaycanda filmlərin təsnifatlaşdırılması işinə start verilir. "Bizim ekspert qrupu bununla bağlı hazırlıq işlərinə başlayır", bunu Milli Televiziya və Radio Şurasının (MTRŞ) sədri Nuşirəvan Məhərrəmli deyib.
Trend -un arayışı: Ekspert qrupu Azərbaycan telekanallarında nümayiş olunacaq bədii filmlərin təsnifatlaşdırılmasını aparacaq. Filmin hansı yaş həddinə aid olduğu müəyyənləşdiriləcək.
Məhərrəmli bildirib ki, bütün dünyada filmlərin təsnifatlaşdırılması həyata keçirilir. "Biz də həm də Mədəniyyət və Turizm Nazirliyinin tərkibində dövlət reyestri həyata keçirilməyə başlanıb. Bu məsələ ortaya çıxandan sonra bütün filmlərin reyestri aparılır. Biz fikirləşirik ki, təsnifatı aparmaq bir qədər çətindir. Hər gün bütün kanallardan filmləri alıb, təsnifatlaşdırsaq, kanallar üçün böyük problemlər yaranacaq. İndi bütün dünyada istehsal olunan filmlərin əksəriyyətində kateqoriyalar müəyyənləşdirilir və kanallar bilirlər ki, bu filmləri hansı saatda göstərmək lazımdır. Bu baxımdan məsələ öz-özünə həll olunacaq və ekspert qrupu məsələyə nəzarət edəcək", - deyən MTRŞ sədri qeyd edib ki, bu məsələni xarici ölkələrdə olduğu kimi burada tətbiq etmək də doğru deyil. "Azərbaycanın spesifikasiyası nəzərə alınmalıdır", - deyə o əlavə edib.
Məqalə müəllifi ilə əlaqə ünvanı: [email protected]
