Azərbaycan, Bakı,17 iyul / Trend , müxbir K.Zərbalıyeva/ Gürcüstanın paytaxtında Cənubi Qafqaz dövlətlərində mülkiyyətin müdafiəsi ilə bağlı qanunvericilik və onun tətbiqi təcrübəsi məsələləri müzakirə olunacaq.
Almaniya Texniki Əməkdaşlıq Cəmiyyətinin (GTZ) "Cənubi Qafqazda məhkəmə və hüquq islahatları" regional layihəsi çərçivəsində iyulun 18-də keçirəcəyi toplantıda Azərbaycan, Gürcüstan, Almaniya və Ermənistandan 25-ə yaxın hüquqşünas iştirak edəcək.
"Hengeler Mueller" Berlin hüquq şirkətinin vəkili Thilo Fleck Almaniyada və keçid dövlətlərində olan müvafiq təcrübədən söhbət açacaq.
Cənubi Qafqazdakı təcrübədən Azərbaycan, Gürcüstan və Ermənistandan gələn məruzəçilər məlumat verəcəklər.
Dəyirmi masada mülkiyyətin müdafiəsi məsələsi ilə bağlı ümumi problemlər müəyyənləşdiriləcək və onların həlli imkanları müzakirə olunacaq.
Cənubi Qafqaz ölkələrində mülkiyyətin müdafiəsinin aktual vəziyyəti barədə nəticələr çixarılacaq və daşınmaz əmlak üzərində mülkiyyətin müdafiəsinin yaxşılaşdırılması ilə əlaqədər ümumi yanaşmalar müəyyənləşdiriləcək.
GTZ Cənubi Qafqazda 1993 ildən məhkəmə və hüquq islahatları sahəsində fəaliyət göstərir. Layihə çərçivəsində qanun layihələri hazırlanır və hüquqi dövlət institutlarının qurulması prosesində milli tərəfdaşlara məsləhətlər verilir.
Müəlliflə əlaqə saxlamaq üçün elektron ünvan - [email protected]
