Azərbaycan, Bakı,18 iyul / Trend , müxbir K.Zərbalıyeva/ Rusiyada həbs olunan Azərbaycanın müxalifətçi Ədalət Partiyasının sədr müavini Etimad İsmayılovun cinayət işi üzrə istintaq başa çatıb.
Bu barədə Trend -a İsmayılovun vəkili Cərulla Ramazanov cümə günü Moskvadan telefonla məlumat verib.
Trend -un arayışı: Millət vəkili İlyas İsmayılovun oğlu Etimad İsmayılov martın 25-də gecə Bakıdan Moskvaya qayıdarkən Rusiya Federal Təhlükəsizlik Xidmətinin (FTX) əməkdaşları tərəfindən Domodedovo hava limanında saxlanılıb. Onun barəsində Rusiya Cinayət Məcəlləsinin "çirkli pulların yuyulması" və "dələduzluq" maddələri ilə ittiham irəli sürülüb. Martın 27-də Çelyabinsk şəhər məhkəməsinin qərarı ilə, barəsində iki ay müddətinə həbs qətimkan tədbiri seçilib. FTX-nin qərarı ilə Etimad İsmayılovun barəsində başlanılmış cinayət işinin istintaqının müddəti avqustun 24-dək uzadılıb.
Azərbaycanlı iş adamı Etimad İsmayılov Rusiyada fəaliyyət göstərən "Avrasiya Sənaye-Maliyyə Qrupu" şirkətinin rəhbəridir.
Vəkil bildirib ki, gələn həftədən etibarən, bu iş üzrə təqsirləndirilən Etimad İsmayılov, Rusiya vətəndaşı, milliyyətcə azərbaycanlı olan Abbas Cəfərov və Ukrayna vətəndaşı Vladimr Qusovun vəkilləri cinayət işinin materialları ilə tanışlığa başlayacaqlar.
Ramazanovun sözlərinə görə, cinayət işi gələn ay məhkəməyə göndərilə bilər. O, məhkəmə prosesinin sentyabrda başlayacağını istisna etməyib.
Vəkil deyib ki, İsmayılov barəsindəki həbs qətimkan tədbirinin dəyişdirilməsi ilə bağlı indiyədək verdikləri şikayətlərin heç biri təmin olunmayıb.
Sonuncu belə şikayətə iyulun 16 -da baxılıb və şikayət təmin olunmayıb.
İsmayılov Çelyabinsk şəhərindəki istintaq təcridxanalırndan birində saxlanılır.
Müəlliflə əlaqə saxlamaq üçün elektron ünvan - [email protected]
