Azərbaycan, Bakı, 19 sentyabr / Trend , müxbir U.Sadıqova, M.İbrahimov/ İslamın düzgün yayılmaması nəticəsində Avropada yayılan islamofobiyanın aradan qaldırılması Qərb ilə müsəlman dünyası arasında uzun müddətli fikir ayrılığı üzrə sülhün əldə olunmasına imkan yaradacaq.
"Hər hansı bir dinin, o cümlədən İslamın təhqir olunması - cinayətdir. Beynəlxalq ictimaiyyət islamofobiyanı cinayət kimi qəbul etməlidir. Bu, Qərb və Şərq arasında münasibətlərin yoluna qoyulmasına imkan yaradacaq", - deyə Trend -a telefonla cümə axşamı müstəqil tədqiqatçı Kemal Özer bildirib.
TimeTurk agentliyinin verdiyi xəbərə görə, Türkiyənin Baş naziri Rəcəb Tayyib Ərdoğan Ramazan iftarında antisemitizm kimi, islamofobiyanın da beynəlxalq cinayət qismində qəbul edilməsinin zəruriliyini bəyan edib.
"İslamofobiya da, antisemitizm kimi, beynəlxalq cinayət qismində qəbul olunmalıdır",- deyə Ərdoğan bildirib.
İslamın əsas norma və prinsipləri əksər hallarda düzgün yayılmadığından, "İslamofobiya" anlayışı Avropa və ABŞ əhalisi arasında geniş yayılıb. Bütün bunlar bəzi İslam ölkələri ilə Qərb arasında mövcud siyasi fikir ayrılıqlarının nəticəsidir.
İslam üzrə amerikalı ekspert Çarlz Battervosun (Charles Butterworth) sözlərinə görə, əsas problem odur ki, insanlar Şərqdəki müharibəni antiterror əməliyyatları kimi qəbul edirlər. Əslində, mübarizə təhlükəsizliyi pozan ayrıca terrorçulara qarşı aparılmalıdır.
" Terrorçuların bir çoxu müsəlman olduğundan, avropalılar və amerikalılar bütün müsəlmanları terrorçu, İslamı isə, terroru bəsləyən din hesab edirlər", - deyə Trend - a elektron poçt ilə Merilend Universitetinin (University of Maryland) politologiya üzrə professoru Battervos bildirib.
O hesab edir ki, avropalıların İslam barədə kifayət qədər biliklərinin olmaması Qərb ilə İslam dünyası arasında uçuruma gətirib çıxarıb, bu məsələdə öz dinlərini səhv izah edən müsəlmanlar da məsuliyyət daşıyırlar.
"Olduqca az insan iudizm, xristianlıq və islamın eyni xəttə malik olduğunu anlayır - onlar hamısı tək Allaha inanan İbrahim peyğəmbərin yolunu gedirlər ", - deyə ekspert bildirib.
İslamofobiya və antisemitizmi dinə mənfi reaksiya birləşdrir, hər ikisi dindarların ünvanına tənqid mahiyyəti daşıyır. Lakin BMT islamofobiyadan fərqli olaraq antisemitizmi, 1948 - ci ildə İsrail dövləti yaranandan sonra beynəlxalq cinayət adlandırıb. İslamofobiya isə əksinə, daha çox qərb əhalisi arasında yayılır və onun yayılmasının dayandırılmasına cəhd olmayıb.
İslam sahəsində müstəqil türk eksperti Əhməd Taşgetirenin sözlərinə görə, BMT bu mövzunu gündəliyə çıxarmalı və Türkiyə Baş nazirinin bəyanatı ilə razılaşmalıdır. Məhəmməd peyğəmbər və 1,5 milyard insanın müqəddəs kitabı olan Quranının təhqir olunması diqqətdən kənar qala bilməz.
"İslam - humanist dindir və İslamı təhqir etmək bu dinin tərəfdarlarını təhqir etməkdir", - deyə Trend - a cümə axşamı İstanbuldan telefonla Taşgetiren bildirib.
O əlavə edib ki, təkcə dini təhqirin cinayət hesab olunduğu Türkiyə deyil, digər İslam ölkələri də islamofobiyaya qarşı mübarizəyə qoşulmalıdır.
Türkiyənin Baş naziri Ərdoğan əvvəllər Avropada fəal antiislam siyasətinə qarşı da fikrini bildirib. O, İspaniyanın xarici işlər naziri ilə görüşündə bildirib ki, Türkiyə hökuməti islamofobiyanın yayılmasına qarşı mübarizəni davam etdirəcək.
Ekspert Özerin sözlərinə görə, bu məsələdə ABŞ -ın BMT- dəki "veto" hüququnu nəzərə almaq lazımdır. Amerika islamofobiyanın beynəlxalq cinayət kimi tanınmasına imkan verməyəcək, çünki İslam dünyasında siyasi maraqlarına nail olmadığından, ilk dəfə antiislam ideologiyasını məhz ABŞ yaymağa başlayıb.
"İslamı siyasətə qatmaq olmaz. Təəssüf ki, Avropa və ABŞ bunu qəbul etmir, lakin məhz siyasi aspekt müsəlmanlarla dialoqa maneə yaradır", - deyə o bildirib.
"Əl-Qaidə" qruplaşması tərəfindən 2001 -ci il sentyabrın 11 - də ABŞ - da törədilmiş terror aktından sonra, islamofobiya daha sürətlə yayılmağa başladı. Ağ Ev ilk olaraq terrorçu - müsəlmanların, daha sonra isə bütün müsəlmanların ünvanına sərt tənqidlə çıxış etdi. Tezliklə islamofobiya Avropaya keçdi və 2005 - ci ildə Danimarkanın "Yullands-Posten" qəzeti Məhəmməd peyğambər və digər İslam müqəddəslərinin karikaturalarını dərc etdi.
"Avropalılar və amerikalılar Quran və xüsusilə də onun rəhm təlimi ilə tanış olmalıdırlar. Yalnız bu halda islamofobiya aradan qaldırıla bilər", - deyə amerikalı ekspert Battervos bildirib.
Məqalə müəllifi ilə əlaqə ünvanı - [email protected]
