Azərbaycan, Bakı, 21 oktyabr / Trend , müxbir K.Zərbalıyeva/ Bir neçə gün öncə hərbi hissələrdə əsgərlərin döyülməsi, təhqir olunması ilə bağlı mobil telefonlarla çəkilən video roliklərin internet vasitəsilə yayımlanması ciddi narahatlıq yaradıb.
Ekspertlər belə faktların orduda kifayət qədər olduğunu, lakin bu qanunsuzluqların ordu rəhbərliyi tərəfindən gizlədildiyini deyir.
Əsgərlərin döyülməsinə dair video-çəkiliş oktyabrın 4-də internetdə yayılıb. Yayımlanan video rolikdəki görüntülərin Daxili İşlər Nazirliyinin Daxili Qoşunlarının Hacıqabul şəhərində yerləşən hərbi hissəsində baş verdiyi məlum olub.
Daxili Qoşunlarının mətbuat xidməti zabitlər Vüqar Ağayev və Eldəniz Rəhimovun sıravi əsgərləri kütləvi şəkildə döydüklərinə görə, həbs edildiklərini təsdiq edib. Faktla bağlı cinayət işi açılıb və istintaq aparılır. Hərbi hissə komandiri və onun müavini tutduqları vəzifədən azad ediliblər.
Oktyabrın 21-də isə internetdə hərbi hissənin tibb məntəqəsində müalicə alan əsgərlərin "dembel"lər (hərbi xidmətinin başa çatmasına az qalmış əsgər) tərəfindən döydürüldüyü barədə görüntülər yayılıb. Görüntü həmin tibb məntəqəsində müalicə olunan başqa bir əsgər tərəfindən mobil telefonun video kamerası ilə çəkilib.
Azərbaycanın hərbi qanunvericiliyi xidmət müddətində hərbçilərin mobil telefondan istifadə etməsinə icazə vermir. Bu, hərbi sirlərin yayılmasının, hərbi hissənin yerləşdiyi ərazinin müəyyən edilməsinin qarşısının alınması baxımından qadağan edilib.
Müdafiə Nazirliyinin mətbuat xidmətinin rəhbəri Eldar Sabiroğlu Trend -a nazirliyin tabeliyində olan hərbi hissələrin əsgərlərinə mobil telefon daşımaga icazə verilmədiyini deyib. Lakin bu qadağa zabitlərə şamil olunmur. Sabiroğlu "Zabitlərə belə bir icazənin verilməsi hərbi sirlərin yayılma təhlükəsi yaradırmı? Buna nəzarət necə həyata keçirilir?" suallarını cavablandırmayıb.
Daxili Qoşunların mətbuat xidmətindən isə bildirilib ki, hərbi hissələrdə əsgərlərin xidmət zamanı mobil telefon saxlaması qadağan olunub. Zabitlərin isə hərbi hissədə olduğu müddətdə mobil telefonlardan istifadəsinə icazə verilmir.
Buna baxmayaraq, hərbçilərin gizli şəkildə mobil telefonlardan istifadəsi hallarının olduğu adıçəkilən qurumların mətbuat xidmətləri tərəfindən təkzib olunmur.
Bu hallara qarşı mübarizə aparıldığı, nəzarətin həyata keçirildiyi bildirilir.
Müstəqil hərbi ekspertlər isə bu sahədə vəziyyətin olduqca dözülməz olduğu qənaətindədir.
Ekspert Üzeyir Cəfərov deyir ki, hərbçilərin mobil telefondan istifadəsinə icazə verilməməsi formal xarakter daşıyır. "Hərbçilərə mobil telefonlardan istifadə olunmaması ilə bağlı imza atdırılır, təcrübədə isə bu qadağaya riayət olunmur", - deyə ekspert vurğulayıb.
Cəfərovun sözlərinə görə, hərbçilərin ailələri, yaxınları ilə telefon danışıqları dövlət hesabına həyata keçirilməlidir: "Xarici ölkələrdə bu məsələlər ciddi tənzimlənir. Bizdə də əvvələr olduğu qayda ilə tənzimlənməlidir. Bizim orduda komandirlər, yüksək rütbəli hərbçilər mobil telefonlarla "kontur yükləmə" kompaniyası həyata keçirirlər. Əsgərlər komandirlərinin mobil telefonlarına kontur yükləyirlər, bunun əvəzində onlara ailələri ilə görüş, məzuniyyət verilir".
Hərbçilərin mobil telefonlardan istifadəsinin orduda hərbi sirrin düşmən tərəfə ötürülməsi halları ilə müşayiət olunduğunu istisna etməyən ekspert deyir ki, belə bir faktla bağlı hazırda Ağır Cinayətlərə Dair İşlər üzrə Məhkəmədə proses davam edir.
Cəfərov əlaqədar qurumların bu halların qarşısını almaq üçün ciddi araşdırma aparmasını vacib sayır.
O, mobil telefonlar vasitəsilə orduda işgəncə, döyülmə faktlarının çəkilib yayılmasını əhəmiyyətli hesab edir. Ekspertin fikrincə, Müdafiə Nazirliyi orduda belə faktların olmadığını dəfələrlə bəyan etsə də, yayılan video-görüntülər belə xoşagəlməz halların mövcudluğunu bir daha təsdiq edir.
Hərbi ekspert Ələkbər Məmmədov deyir ki, zabitlərə mobil telefondan istifadə üçün icazə yalnız ailələri ilə əlaqə saxlamaq üçün verilir. Onun sözlərinə görə, hərbçilərin sosial vəziyyəti ürəkaçan olmadığından onlar ailələrindən ayrı yaşayırlar. Həmçinin zabitlər mobil telefonlarla əsgərlərə valideynləri ilə danışmaq imkanı yaradırlar. "Sıravi əsgərlərdə mobil telefonlara çox az hallarda rast gəlinir. Mobil telefonlar daha çox zabitlərdədir. Həmin telefonlar vasitəsilə zabitlərin hansısa hərbi sirri yaymamasına heç kim zəmanət vermir. Ona görə də müvafiq qurumlar zabitlərin telefon danışıqlarını nəzarətə götürməlidir", - deyə Məmmədov vurğulayıb.
Ekspertin fikrincə, hərbçilər üçün normal şərait, hərbçilərin şikayət etmə mexanizmi yaradılarsa, əsgərlərə valideynləri ilə əlaqə saxlamaq imkanı verilərsə, hərbçilərin hüquqlarının müdafiəsi təmin olunarsa, mobil telefondan istifadəyə ehtiyac olmaz.
Müəlliflə əlaqə saxlamaq üçün elektron ünvan- [email protected]